Янги авлод: Ҳусанов Ямал билан бир рўйхатдан жой олди
- 13-июн, 09:16
- Zohir Toshxo’jayev
- 0
- Футбол
2026 йилги жаҳон чемпионати бошланди. 48 мамлакат терма жамоаси бош соврин учун курашни бошлади. Ҳар бир терма жамоа таркибида тажрибали ва энг кучли футболчилар қаторида ёш истеъдодлар ҳам бор.
Футбол экспертлари 2026 йилги жаҳон чемпионати иштирок этаётган истиқболи порлоқ янги авлод вакиллари рўйхатини тузди. Унга Ўзбекистон миллий терма жамоасидан Абдуқодир Ҳусанов киритилди.
Sports.uz портали ушбу рейтингдан ўрин олган футболчилар билан таништиради.
Ламин Ямал (18 ёш, Испания)
Бугун унинг номи бутун дунёга маълум, аммо у ҳали жаҳон чемпионатида қатнашмаган.
“Евро–2024” турнирида у ҳақиқий сенсацияга айланди. Францияга қарши ярим финалда 16 ёшли вундеркинд томонидан киритилган тўп мусобақанинг энг яхши голи, деб топилган ва узоқ йиллар эсда қоладиган воқеага айланган.
Нико Уильямс (23 ёш, Испания)
2025 йил ёзида уни “Барселона” ва “Бавария” сотиб олишни истаган. Бироқ Нико ўзининг “Атлетик Бильбао” клуби билан шартномасини яна 10 йилга узайтирди.
У “Евро–2024” юлдузларидан бири бўлиб, Ламин Ямал билан бирга замонавий футболнинг энг хавфли қанот жуфтликларидан бирини ташкил этади.
Жамол Мусиала (23 ёш, Германия)
Мусиала – бу олдиндан тахмин қилиб бўлмайдиган дриблинг, тушунтириш қийин бўлган голлар ва такрорлаш мушкул ҳаракатлар демакдир.
У клуб миқёсида ўзини аллақачон исботлаган. Энди эса ўз иқтидорини жаҳон чемпионати саҳнасида намоён қилиш вақти келди.
Арда Гюлер ва Кенан Йилдиз (21 ёш, Туркия)
Арда Гюлер плеймейкер сифатида ажойиб статистикага эга. Маълумотларга кўра, у ҳар 90 дақиқада ўртача 3,6 та голли вазият яратади.
Кенан Йилдиз эса уни идеал тарзда тўлдиради. Гюлер ўйин қурса, Йилдиз гол уриш ҳиссиёти билан ажралиб туради.
Бу футболчилар “ЖЧ–2026”нинг энг катта кашфиётларидан бири бўлиши мумкин.
Дезире Дуэ (21 ёш, Франция)
“Пари Сен-Жермен” қанот ҳужумчиси ўз авлодининг энг олдиндан айтиб бўлмайдиган футболчиларидан бири ҳисобланади. Унинг жаҳон чемпионатидаги дебюти халқаро даражадаги буюк карьерасининг бошланиши бўлиши мумкин.
Абдуқодир Ҳусанов (22 ёш, Ўзбекистон)
“Бунёдкор” тарбияланувчиси аввал “Энергетик-БГУ” (Беларусь), кейин эса Франциянинг “Ланс” клубида тўп сурди.
Шундан сўнг у 40 миллион евро эвазига Англиянинг “Манчестер Сити” клубига ўтди. Пеп Гвардиола уни кўп йилларга мўлжалланган энг яхши трансферлардан бири, деб атаган.
Энди Ҳусанов Ўзбекистонни тарихдаги илк жаҳон чемпионатига бошлаб чиқмоқда.
Дзион Судзуки (23 ёш, Япония)
Судзуки ҳозирги кунда Италиянинг “Парма” клуби ва Япония миллий терма жамоасининг асосий дарвозабони ҳисобланади. Унга Европанинг етакчи клублари қизиқиш билдирган. Жаҳон чемпионати эса уни япон футболининг янги рамзига айлантириши мумкин.
Керим Алайбегович (18 ёш, Босния ва Герцеговина)
2026 йил 31 март куни Италияга қарши плей-офф баҳсида пенальтилар сериясида айнан унинг зарбаси Босния ва Герцеговинани жаҳон чемпионатига олиб чиққан.
Ўйиндан кейин у шундай деган: “Пенальтиларга навбат келганда гол уришимни билардим. Дарвоза олдида ким турганининг аҳамияти йўқ”.
Жаҳон чемпионати унинг фаолиятидаги биринчи йирик мусобақа бўлади.
Экспертларнинг таъкидлашича, жаҳон чемпионатида эътибор қаратилиши керак бўлган яна тўрт нафар ёш футболчи бор. Булар:
Ибраим Мбайе (18 ёш, Сенегал)
17 ёшидаёқ “Пари Сен-Жермен” таркибида Европа Чемпионлар лигасини қўлга киритган. 18 ёшида эса ўзининг биринчи жаҳон чемпионатида иштирок этади.
Рюносуке Сато (19 ёш, Япония)
Жаҳон чемпионатида қатнашадиган Япония терма жамоасида миллий чемпионатда ўйнайдиган ягона футболчи ҳисобланади.
Нико Пас (21 ёш, Аргентина)
Аргентина термасидаги дебют учрашувидаёқ Лионель Мессига голли узатма берган.
Пау Кубарси (19 ёш, Испания)
Марказий ҳимоячи бўлиб, аллақачон “Барселона”нинг асосий таркибидан мустаҳкам жой олган.
Хулоса
2026 йилги жаҳон чемпионати нафақат Лионель Месси, Криштиану Роналду, Ҳарри Кейн каби афсоналарнинг навбатдаги турнири, балки Ламин Ямал, Жамол Мусиала, Дезире Дуэ, Абдуқодир Ҳусанов каби янги авлод юлдузлари бутун дунёга ўзини намоён қиладиган мусобақа ҳам бўлади.
Марказий Осиё мухлислари учун эса асосий эътибор, шубҳасиз, Абдуқодир Ҳусанов ва Ўзбекистон миллий терма жамоасининг тарихий дебютига қаратилади.