Хотиним кўнса, Аргентинага қайтаман!

Аргентиналик ҳужумчи Лаутаро Мартинес ҳозирда “Интер” жамоасининг асосий ўйинчиларидан бири ҳисобланса-да, аммо унинг юраги ҳали ҳам ўз юртидаги “Расинг” клуби билан боғланган.

Ҳужумчи 2018 йилда Аргентинадан кетиб, “Интер” сафига қўшилган. Шундай бўлса-да, у “Расинг” мухлислари учун ҳали ҳам афсонавий футболчи бўлиб қолмоқда ва келажакда Маритнес яна қадрдон жамоасига қайтишни орзу қилаётганини тасдиқлади.

Мартинес ўз фаолиятини “Расинг”да бошлаган ва 62 та ўйинда 27 та гол уриб, мухлисларининг севимли ўйинчисига айланган. 2018 йилда Лаутаро катта трансфер орқали “Интер”га ўтган.

Ҳозирда 26 ёшли ҳужумчи А Серияда энг самарали футболчилардан бири бўлиб, жамоасининг чемпионлик учун курашада муҳим фигура ҳисобланади.

Италиядаги фаолияти юқори даражада ўтаётганига қарамай, Лаутаро ўз ватани билан боғлиқликни сақлаб қолган. Бироқ Аргентинага қайтиш фақат футболчининг ўзига боғлиқ эмас. Аргентина радиосига берган интервьюсида Мартинес бу масалада оила муҳим роль ўйнашини ҳазил аралаш таъкидлади:

- “Расинг”га кайтиш — менинг орзум. Мен хотинимни кўндиришга ҳаракат қиляпман, у мени қўллаб-қувватлайди, деб умид қиламан. Албатта, бу кўп нарсаларга боғлиқ: оилавий ҳолат ва жисмоний ҳолатимга ҳам. Аммо менинг орзум — бир йилгина бўлса ҳам “Расинг”да тўп тепишдан иборат, - деди Лаутаро Мартинес.

“Интер” билан шартномаси 2029 йилнинг ёзигача давом этишини айтган Мартинес ҳозирча Италияда қолиш ниятида эканини билдирди:

- Менда “Интер” билан яна уч йиллик шартнома бор. Мен узоқ вақт юқори даражада ўйнашни хоҳлайман. Ўзимни яхши ҳис қиляпман ва ҳали ёшман. Лекин келажакда болаларимга “Расинг” мухлисларининг менга бўлган муҳаббатини кўрсатмоқчиман, - деди Мартинес.

У шунингдек, “Расинг” клуби  президенти ва “Интер” афсонаси Диего Милито билан алоқаси ҳақида ҳам гапирди:

- Биз ҳар ҳафта гаплашиб турамиз. У менинг карьерам бошиданоқ ёнимда бўлган. Жароҳат олганимда ҳам ёзган. “Расинг” ҳозир яхши ҳолатда эмас, лекин мен унга қўллаб-қувватлайман, - деди Лаутаро.