Хориж клубларига Ўзбекистондан футболчи олишни тавсия қилишди

Футболчилик даврида “Манчестер Юнайтед”, “Эвертон”, “Манчестер Сити” ва “Саутгемптон”, “Рейнжерс” ва “Фиорентина” каби машҳур клубларда ўйнаган Андрей Канчельскис ўзбек футболи ҳақида фикр билдирди.

Мураббийлик фаолияти давомида икки бор “Навбаҳор” бош мураббийи бўлган россиялик мутахассис Россия клубларини ўзбек футболчиларига эътибор қаратишга чақирди.

- Ўзбекистонда футбол жуда тез суръатлар билан ривожланмоқда, уларнинг терма жамоаси жаҳон чемпионатига шунчаки ўз-ўзидан  чиққани йўқ.

Бизнинг клублар Осиёдан футболчиларга эътибор қаратиши лозим. Бу бизга яқин ва дўстона муносабатда бўлган ҳудуд, у ерда кўплаб истеъдодли ўйинчилар бор, - деди Андрей  Канчельскис.

Бугунги кунда ўзбек футболининг энг ёрқин вакили сифатида Абдуқодир Ҳусанов тилга олинмоқда. 21 ёшли ҳимоячи “Бунёдкор”да тарбияланган, профессионал фаолиятини Беларуснинг “Энергетик-БГУ” клубида бошлаган.

Абдуқодир ёш бўлишига қарамай, иккита топ-лига – Франция ва Англия чемпионатларида майдонга тушган биринчи ва ҳозирча ягона ўзбек футболчиси ҳисобланади. Бундан ташқари, transfermarkt портали экспертлари томонидан 35 миллион еврога баҳоланган Ҳусанов Марказий Осиёнинг энг қимматбаҳо ўйинчисидир.

 Таъкидлаш жоизки, мамлакатимиз тарихида илк бор жаҳон чемпионатига йўлланма олган Ўзбекистон миллий терма жамоаси аъзолари орасида Абдуқодир Ҳусановдан бошқа легионер мақомида хориж чемпионатларида тўп тепаётган футболчиларимиз кўп.

Хусусан, “топ-5” лигалар сирасига кирувчи Италия А Сериясида “Женоа”, “Специя”, “Кальяри” ва “Рома”да ўйнаган Элдор Шомуродов бу мавсумдан эътиборан Туркиянинг “Истанбул Башакшеҳир” жамоаси шарафини ҳимоя қилмоқда.

Москванинг ЦСКА клубида Россия кубоги ва Суперкубогига эга чиққан Аббосбек Файзуллаев ҳам “Башакшеҳир”да голлари ҳисобини очишга муваффақ бўлди. Ҳусниддин Алиқулов эса, бир неча мавсумдан бери “Ризеспор” жамоасида ўйнаяпти.

Шунингдек, Рустам Ашурматов, Одилжон Ҳамробеков, Жалолиддин Машарипов, Остон Ўрунов, Ўткир Юсупов Эрон футболида ном қозонган ўзбек футболчилари ҳисобланади.

Отабек Шукуров, Абдулла Абдуллаев, Азиз Ғаниев, Акмал Мозговой араб мамлакатларида ўзбек футболи қудратини намойиш қилиб келаётган чарм тўп усталари рўйхатида  туради.

Ўзбекистон улкан ҳурматга лойиқ! Португалия устози Мартинес яна нималар деди?

Бу хатодан кейин Гвардиола Ҳусановни асосий таркибга қайтариши шарт