"Хавоканд" устози: "Гуруҳимизда "Андижон"нинг ўйини менга анча маъқул келди. Барибир даража билинди"

“Хавоканд” – “Андижон” (1:8) ўртасидаги учрашувдан кейинги матбуот анжуманининг иккинчи қисмида мезбонлар бош мураббийи Самандар Мелибоев қатнашди.

- Аввало, бутун Ўзбекистон халқини Қурбон Ҳайит байрами билан табриклайман. Ўйинга келадиган бўлсак, ҳар сафар айтяпмиз, барибир класс – бу класс. Бу билинтиряпти. Бизда ҳаваскорлар ва футболга нопрофессионал ёндашишяпти. Майда-чуйда деталларга ҳам эътибор бериб, катта футболни унутиб қўйишяпти. Ҳакамларга гапирадим-ей...Хуллас, “Андижон” ва “Насаф”ни гуруҳдан чиқишгани билан табриклайман. Кучимиз етмади. Лекин бизни қўллаб-қувватлаган мухлисларга, ташкилотчиларга, Қўқон стадионига, раҳбариятга миннатдорчилик билдираман.

- “Андижон”га қарши ўйинда тажриба борасида айнан нима ўргандик, деб ўйлайсиз?

- Биргина шу ўйин эмас, учта ўйин ўтказдик. Биз 10 кун давомида катта футболда юрдик. Ўтган йили иккинчи лигада ўйнагандик. Бу йил биринчи лигага чиқдик ва ҳали унга мослашмасдан туриб Суперлига клубларига қарши ўйнадик. “Андижон” жуда яхши савияда кетяпти. Ўз ўйинини тиклаб олди. Юқори даражасида турибди. Гуруҳимизда “Андижон”нинг ўйини менга анча маъқул келди. Барибир даража билинди. Футболга ҳақиқий ёндашиши бошқача. “Андижон”да терма жамоага муносиб футболчилар борлиги кўриниб турибди. Биз кўп нарса олдик, нафақат футболчилар, балки ўзимиз ҳам кўпроқ нимани устида ишлашимиз кераклиги ва камчиликларимизни билиб олдик.  

- “Хавоканд” дастлаб “Насаф”га 6:1, кейин “Шўртан”га 1:4 ҳисобида ютқазди. “Андижон”га қарши беллашув олдида натижани яна йириклашиб кетиши мумкинлигидан қанчалик хавотирда эдингиз?

- Хавотир бўлди. Доим шунақа йирик ҳисобда ютқазавериш ҳам ҳеч кимга ёқмайди. “Андижон” ҳам бор кучи билан ўйнади, 1-ўринга курашди, бу билиниб турди. Уларга кўп голлар керак бўлган экан, шунинг учун ҳаракат қилишди. Ярим куч билан ўйнашмади. Шижоати ҳам кўриниб турди. Охиригача астойдил ўйнадилар. Ҳимоямизда анча иш қилишимиз керак экан. Кўпроқ голлар бўлиб кетиши бўйича хавотиримиз бор эди. Шу нарса бўлди. Шунақа қилиб тажриба орттиримиз-да. Шундан тўғри хулоса чиқариб, биринчи лига ўйинларига ёндашишимиз керак.