Хави ўзидай ўйнай оладиган уч футболчи номини айтди

Испан футболининг энг маҳоратли ярим ҳимоячиларидан бўлган Хави Эрнандес ҳозирги пайтда худди унга ўхшаб ўйнай оладиган уч нафар футболчи борлигини эътироф этди.

Афсонавий собиқ футболчи биринчи навбатда “Барселона”нинг ҳозирги юлдузи Педрини тилга олди. Шунингдек, “Ливерпуль”дан аргентиналик Алексис Мак Аллистер ва ПСЖдан португалиялик Витиньянинг ўйинини ҳам юқори баҳолади.

- Педри, Мак Аллистер ва Витинья менга энг кўп ўхшайди. Улар ўйинни жуда яхши тушунишади. Ҳар бир пас бу онгли ҳаракатдир. Улар пас бериш пайтида аллақачон кейин нима қилишини ўйлаб қўйишади. Бу шунчаки пас бериш учун амалга оширилган узатма  эмас, - деди Хави.

Хави профессионал футболчилик фаолиятини 2019 йилда тугатганидан кейин мураббийлик фаолиятини бошлаган. Унинг охирги жамоаси айнан “Барселона” бўлган эди.