Хамзат Чимаевнинг мағлубиятига нима сабаб бўлди?

Америкалик UFC жангчиси Стивен Томпсон БАА шарафини ҳимоя қилувчи ММА устаси Хамзат Чимаев нега Шон Стриклэнддан енгилганини айтди.

"Хамзат Стриклэндга қарши жангга етарлича тайёрланмаган бўлиши мумкин, чунки у машғулот йиғинининг кўп қисмини Россияда эмас, функционал тайёргарлик бўйича мураббий Сем Калавиттанинг гаражида ўтказди.

Чимаевнинг Дю Плессига қарши баҳсга тайёргарлигини кўрганимда, у Доғистон ёки унинг яқинида кўп машқ қилганини эслайман. Лекин бу сафар ундай бўлмади.

Хамзат Шон билан тўқнашувга енгилтаклик билан ёндашди, демоқчи эмасман, лекин у баҳс бунчалик оғир бўлишини кутмагани аниқ. Шунингдек, албатта, Шонга ҳам тан бериш керак - у ажойиб жанг ўтказди", – деди Томпсон "MMA Full Mount" подкастида.

Эслатиб ўтамиз, "UFC 328" турнирида Чимаев очколар эвазига Стриклэнддан мағлубиятга учради ва ўрта вазндаги чемпионлик камарини бой бериб қўйди.