Хаби Алонсо Дастан Сатпаевнинг "Челси"даги биринчи голига қандай муносабат билдирди?

Лондоннинг «Челси» жамоаси бош мураббийи Хаби Алонсо Австралиянинг «Вестерн Сидней Уондерерс» клубига қарши ўртоқлик учрашувида гол урган қозоғистонлик ёш ҳужумчи Дастан Сатпаев ҳақида фикр билдирди.

6:4 ҳисобидаги ғалабадан сўнг испаниялик мутахассисдан 17 ёшли форварднинг ўйини ва унинг келаси мавсумдаги имкониятлари ҳақида сўрашди. Алонсо сўзларига кўра, жамоадаги таркибий масалалар бўйича якуний қарорлар мавсум олди тайёргарлик якунлангач қабул қилинади.

- Бу мавсум олди йиғин давомида жуда кўп қарорлар қабул қилишимиз керак бўлади. Яхши томони шундаки, ўтган йили бу ерда бўлмаган кўплаб футболчиларни ҳозир синовдан ўтказиш имкониятига эгамиз… Кейин қарор қиламиз, шунинг учун ҳозирча мавсумнинг биринчи ўйинига қай таркибда тушишимиз ҳақида гапириш учун эрта, — деди Алонсо.

«Челси» устози алоҳида тарзда Сатпаевнинг ўйин услубини ҳам баҳолади.

- Мен Дастанни ўтган йилдан, Алмати клубидаги ўйинларидан биламан. Унинг бошқачароқ футболчи экани кўриниб турибди. Рақиб дарвозаси олдида доим хавф туғдиради, марказий ҳужумчи ёнида, қанотдан марказга силжиб, бўш ҳудудларга жуда яхши ҳужум қилади. У учун бу клубдаги биринчи тажриба, шунинг ўзида ўзини яхши томондан кўрсата олди, — дея таъкидлади испаниялик мутахассис.

Сатпаевнинг жисмоний жиҳатдан Англия Премьер-лигасида ўйнашга тайёрлиги ҳақида берилган саволга эса Алонсо қисқа жавоб қайтарди:

 - У жуда бақувват ва жуда тезкор. Ундан ростдан ҳам таассурот оласиз, — деди мураббий.

Эслатиб ўтамиз, «Вестерн Сидней Уондерерс»га қарши ўйинда Сатпаев ҳисобни аллақачон олтинчи дақиқада очган эди. Лондонликлар таркибида шунингдек Дариу Эссугу, Жейми Гиттенс ва хет-трик муаллифи Жоау Педру ҳам гол урди.