Воситачилар “Реал”га “Сити” марказий ҳимоячиси ва плеймейкерини таклиф қилди

Футбол агентлари ва воситачилари жорий мавсумни совринсиз якундаган “Реал” таркибда ўзгариш қилишини инобатга олиб, Мадрид суперклубига “Манчестер Сити”нинг икки фуболчиси хизматларини таклиф қилди.

Хусусан, “Реал” клубига “Манчестер Сити”нинг етакчи марказий ҳимоячиси Йошко Гвардиол номзоди таклиф қилинди. Испания гранди ҳимоя чизиғини кучайтиришни асосий вазифалардан бири сифатида белгилаган.

Бу ҳақда AS нашри хабар бермоқда.

Манба маълумотига кўра, ҳозирча мадридликлар ва “шаҳарликлар” ўртасида хорват футболчисининг трансфери бўйича музокаралар бошланмаган. Бироқ футболчининг агентлари унинг “Қироллик клуби”га ўтиш вариантини ўрганмоқда.

Шунингдек, “Реал”га Манчестердан кетиши аниқ бўлиб улгурган жамоа сардори ва плеймейкери Бернарду Силва хизматлари ҳам таклиф қилинган. Таъкидланишича, португалиялик футболчи ёзда жамоани эркин агент сифатида тарк этади ва жаҳон чемпионатигача ўзига янги жамоа топмоқчи.

Манбада айтилишича,  аввалига “Барселона”да ўйнаш вариантини устун қўйган Бернарду Силва кейинчалик бу фикридан қайтган. 31 ёшли футболчи олдида яна бир неча бошқа вариантлар ҳам бор.