Вирц Салоҳнинг шов-шувли баёноти ҳақида: "Мен бу фикрларни тўлиқ қўллаб-қувватлайман демайман"

"Ливерпуль" ҳужумкор ярим ҳимоячиси Флориан Вирц Муҳаммад Салоҳнинг ижтимоий тармоқлардаги сўнгги баёноти ҳақида фикр билдирди.

Мисрлик ҳужумчи "Ливерпуль" яна рақиблар қўрқадиган кучли ҳужумкор жамоага айланишини исташини айтган эди.

"Мо клубни аллақачон яхши билади. У шунчаки ҳалол инсон ва ўйлаганини айтади. Бу — нормал ҳолат. Агар фикр билдиришни истасанг, бунга ҳаққинг бор.

Албатта, бу мавсум ҳаммамиз учун оғир кечмоқда, жумладан Салоҳ учун ҳам. Менимча, унинг сўзлари атрофида ортиқча шов-шув кўтарилди. У ҳеч кимни айблашни истамаган.

Мен бу фикрларни тўлиқ қўллаб-қувватлайман демайман, аммо Моʼнинг менталитети, воқеаларга қараши ва ишлаш услуби менга ёқади. У кўп нарсани кўрган, шунинг учун уни тинглаш керак.

Бошқа футболчиларнинг лайклари билан боғлиқ вазият ҳам ҳаддан ташқари катталаштирилди. Менимча, у клубдагиларнинг барчасини сергак торттирмоқчи бўлган", — деди Вирц.

Эслатиб ўтамиз, Муҳаммад Салоҳ жорий мавсум якунланганидан кейин "Ливерпуль"ни тарк этади.