Валентина Шевченко: "Гендер тенглиги" сўзидан нафратланаман!
- 7-январ, 12:15
- Javohir Malikov
- 0
- MMA
UFC чемпиони Валентина Шевченко эркаклар ва аёллар ўртасида жанглар ўтказишга кескин қаршилик билдирди.
Унинг сўзларига кўра, спортчи машғулотларда, асосан, эркаклар билан спарринг қилади. Чунки унинг мураббийи Павел белгилаган юқори суръатга чидай оладиган қизлар жуда кам.
"Қизлар бир машғулотни ўтаб бериш мумкин, аммо бир-икки-уч ой давомида шу ритмда ишлашга дош беролмайди — кўплари "синиб кетади". Шу боис катта ареналарда эркаклар ва аёллар ўртасидаги жангларни ўтказишни мутлақо нотўғри, деб ҳисоблайман", — дейди Шевченко.
Яна унинг таъкидлашича, машғулот пайтида у кўплаб эркак жангчилардан техник ва жисмоний жиҳатдан устун келади. Бироқ бу ҳолатни расмий жангларга кўчириш мумкин эмас.
"Ареналарда бундай жангларга йўл қўйиб бўлмайди. Бу табиатга қарши иш. “Гендер тенглиги” дея замонавий ва сунъий оқимларга эргашмаслик лозим. Очиғи, мен бу иборадан нафратланаман, ҳатто унинг талаффузидан ҳам. Аёллар аёллар билан, эркаклар эса эркаклар билан беллашиши керак", — деди UFC чемпиони.