Улуғбек Бақоев 5:2 ҳисобидаги ғалабадан сўнг: "Ҳисоб янада йирикроқ бўлиши мумкин эди"

Суперлиганинг 10-туридан ўрин олган "Сўғдиёна" - "Сурхон" (5:2) учрашувидани кейинги матбуот анжуманида мезбонлар бош мураббийи Улуғбек Бақоев қуйидагиларни айтди:

"Менимча, ўйин яхши ўтди. Биринчи бўлимни тўлиқ назорат қилдик ва иккита гол урдик. Аслида яна гол уриш имкониятларимиз ҳам бор эди. Иккинчи бўлимда ҳам шу руҳда давом этдик — интизом билан ўйнадик, тезкор ва самарали қарши ҳужумлар ташкил қилдик. Яна иккита гол урдик ва ҳисобни янада йириклаштиришимиз ҳам мумкин эди.

Бироқ шундан кейин қисқа вақт ичида иккита гол ўтказиб юбордик ва ўйинда кутилмаган тартибсизлик юзага келди. Бу ҳолат биз учун ҳам бироз кутилмаган бўлди ва йигитлар орасида озгина ҳаяжон пайдо бўлди.

Кейинчалик бешинчи голни уриб, ўйинни яна назоратга олдик ва вазиятни барқарорлаштирдик. Шу билан бирга, “Сурхон” жамоаси дарвозабонини ҳам алоҳида таъкидлаш керак — у кўплаб хавфли вазиятларда жамоасини қутқариб қолди. Акс ҳолда ҳисоб янада йирикроқ бўлиши мумкин эди.

Умуман олганда, йигитларга ғалаба ва майдондаги фидойилиги учун миннатдорчилик билдираман. Энди эса эътиборимизни кейинги турга қаратамиз ва тайёргарликни давом эттирамиз".