"UFC 327" турнири ҳақида. Ярим оғир вазндаги камар бўш қолди: интизом ҳаосга қарши!

Хабарингиз бор, Ўзбекистон вақти билан 11/12 апрель куни соат 02:30 да бошланиши режалаштирилаётган "UFC 327" турнирининг марказий жанги Иржи Прохазка ва Карлос Ульберг ўртасида бўлиб ўтади.

Омад туфайли супер енгил вазн тоифасида чемпионга айланган Жошуа Ван эса оқшомнинг иккинчи марказий жангида япониялик Тацуро Тайра билан баҳс олиб бориши лозим эди. Бироқ бир ҳафта олдин янги аср авлодлари ичра биринчи чемпион бўлган мьянмалик юлдуз кичик жароҳати туфайли қатнаша олмаслигини билдирди. Шундан сўнг промоушен эгалари мазкур қарама-қаршиликни келаси ойга кўчиришди.

Энди эса иккинчи марказий жанг сифатида, дастлаб, прелим кардда кўрсатилиб, кейин асосий карднинг очилиш тўқнашуви поғонасига олиб чиқилган Азамат Мурзаканов ва Пауло Коста иштирокидаги баҳс танланди. Мазкур кечада, қолаверса, Кёртис Блайдс, Жош Хокит, Доминик Рейс, Жонни Уокер, Каб Суонсон, Нейт Ландуер, Патрисио Питбулл, Аорон Пико, Маттеуш Гамрот, Кейвин Холланд, Татьяна Суарез, Келвин Гастелум ва Виценте Луке каби ММА юлдузлари иштирок этишади.

Эътибор марказидаги Иржи Прохазка ва Карлос Ульберг жанги превьюсини ҳар икки спортчини индивидуал тарзда тахлил қилароқ бошласак.

Прохазка - чехиялик хаос машинаси. Услубида интизомни хушламайди. Профессионал фаолиятидаги 32 ғалабасининг 31 таси муддатидан олдин қўлга киритилган. UFC ташкилотидаги 8 жангининг иккисида промоушен афсоналаридан бири Алекс Перрейрадан мағлубиятга учраган, бошқа рақибларини ё эзган, ё янчган. У лигадаги дебютида Волкан Оздемирни нокаут қилиб, рақибига фаолиятидаги энг аламли мағлубият таъмини тоттирган. Иржи учинчи жангидаёқ чемпионликка даъвогар бўлди ва ушбу ишни уддалади. Унинг мазкур вазнда чемпион эмаслигининг ягона сабаби "Поатан" эди, аммо ҳозир ўша сабаб йўқолди.

Техник жихатдан таҳлил қиладиган бўлсак, Прохазка деганда кўз ўнгимизга сакраб тизза зарбаларини бериши келади. Қаҳрамонимизнинг энг устун тарафи ҳам мана шу. Жағи бақувват, шунинг хотиржамлиги бўлса керакки, мудофаа пайтида қўллар жуда пастда туради, келаётган зарбадан қочишни яхши уддалайди. Турнирдаги деярли барча жангларида ёрқин  чиқишлари учун қандайдир бонус қўлга киритиши эса бизни кутиб турган жангнинг салобатини белгилаб бермоқда…

Карлос Ульберг - ушбу вазнда энг юқори потенсиялга эга ММАчилардан. У сўнгги 4 жангини Доминик Рейс, Ян Блахович, Волкан Оздемир ва Алонзо Менифилдга қарши ўтказиб, уларнинг барчасида ғалаба қозонди. Аслида ярим оғир вазнда тахминан 30 га яқин жангчи бор, холос. Шунинг учун рейтингда катта ўзгаришлар тез-тез содир бўлиб туради.

Техник таҳлилига ўтадиган бўлсак, жуда интизомли спортчи ҳисобланади ва зарбаларини гулзордан гул тергандек саралаб амалга оширади. Ўзига хос ҳайратланарли тарафи бўлмаса-да, тартибни энг катта қуроли сифатида кўради. У 13-1 лик рекордга эга. UFC даги дебют тўқнашувда учралган мағлубият, фаолиятидаги кичик қора дог бўлиб турибди. Бунга балки ҳаяжон таъсир қилган бўлиши хам мумкин.

Ушбу жанг учун кичик фаворит сифатида Иржи Прохазкани олишимиз мумкин. Шояд у зафар қучса, кейинги рақиби Магомед Анкалаев бўлиш эҳтимоли ёқори. Ютқазган Ульберг эса обрўсини қайтариш учун вакилимиз Богдан Гуськов билан жанг қилса керак. Агар прогнозларимиз ўхшаса, бу – ҳамюртимизга ҳам юқори поғоналарга кўтарилиш учун ажойиб имконият бўлади.

Азизбек ҒОЗИЙ тайёрлади