Европа футбол ассоциациялари иттифоқи (УЕФА) Чемпионлар Лигаси финалида "Интер"га қарши ўйинда (5:0) ПСЖ мухлисларининг хатти-ҳаракати учун Париж клубини жазолайди. Бу ҳақда Mundo Deportivo хабар бермоқда.
Манбага кўра, парижликлар мухлислари ўйин давомида пиротехника (фаер) ёққани учун жазога тортилади — бу ҳолат стадионда қалин тутун ҳосил қилган. Фаерлардан фойдаланиш УЕФА қоидалари билан қатъий тақиқланган.
Шунингдек, ўйиндан сўнг "Интер" билан учрашув якунида минглаб мухлислар майдонга бостириб киргани учун ҳам ПСЖга нисбатан чоралар кўрилади. Бу вазият туфайли футболчилар зудлик билан кийим алмаштириш хонасига қайтишга мажбур бўлишган.
Бундан ташқари, ўйин олдидан икки жамоа мухлислари ўртасида тўқнашувлар содир бўлган. УЕФАнинг Интизомий кодексига кўра, клублар стадион атрофида, ўйиндан олдин ва кейин мухлисларнинг хатти-ҳаракатлари учун жавобгар ҳисобланади. Агар ҳодисалар стадион яқинида содир бўлгани аниқланса, "Интер" ҳам жазога тортилиши мумкин.