U-17 Мундиалларида порлаган топ-10 та юлдуз

Шу кунларда 17 ёшгача бўлган футболчилар ўртасида Жаҳон чемпионати баҳслари бўлиб ўтмоқда. Биз эса кичик мундиалларда порлаган ва кейинги фаолияти ёрқин тарзда давом этган топ-10 та футболчилар ҳақида гаплашамиз.

Биринчи ўрин. Германия терма жамоаси билан 2007 йилги кичик мундиал финалчиси ва мусобақанинг энг яхши футболчиси деб топилган Тони Кроос. Жанубий Кореяда бўлиб ўтган турнир давомида футболчи 4 гол урган ва 5 та голли узатмани амалга оширган эди. Кейинчалик Кроос "Бавария" билан Чемпионлар лигасида ғалаба қозонди. "Реал" билан эса бутун футболчилик фаолиятидаги энг ёрқин даврларини ўтказди. "Қаймоқранглилар" билан 5 марта Чемпионлар лигаси кубогини боши узра баланд кўтарди. 

Иккинчи ўрин. Сеск Фабрегас. У Финляндия яшил майдонларида бўлиб ўтган ўсмирлар ўртасидаги Жаҳон чемпионати ғолиблигини ва турнирнинг "Олтин тўп"ини қўлга киритди. Испаниялик футболчи миллий терма жамоа билан Жаҳон ва Европа чемпионатида ғалаба қозонган.  Фаолияти давомида "Арсенал", "Барселона" ва " Челси" каби гранд клубларда тўп тепган. Ҳозирда эса "Комо" жамоасида бош мураббий сифатида фаолият олиб бормоқда.

Учинчи ўрин. Англия терма жамоаси вакили Фил Фоден. 2017 йил Осиё қитъасида бўлиб ўтган ўсмирлар Мундиалида 4 гол уриб 4 та голли узатмани амалга оширди, Бундан ташқари турнирнинг энг яхши футболчиси деб топилган Фоден терма жамоаси билан мусобақанинг бронза медалларини  қўлга киритган. Ҳозиргача "Манчестер Сити" сафида тўп тепиб келаётган иқтидор "шаҳарликлар" билан Англия Премьер-лигаси ва Европа Чемпионлар лигасида ғалаба қозонди. 

Тўртинчи ўрин. "Галатасарой" етакчи Виктор Осимхен. 2015 йил Чилида ўтказилган Жаҳон чемпионатида Нигерия терма жамоаси билан чемпионликни қўлга киритди. Бундан ташқари 17 ёшли форвард турнир давомида 10 гол уриб, мусобақанинг "Олтин бутса"си соҳибига айланди. Мундиалдан сўнг бир қатор тўп жамоалар уни жиддий кузатиб борди. Осимхен ўзининг гуллаган вақтини "Наполи" сафида ўтказди. Неаполликлар билан А Серияда зафар қучди. Ҳозирда эса Истанбулнинг " Галатасарой" жамоасида тўп тепмоқда. 

Бешинчи ўрин. Яна бир Нигерия терма жамоаси ҳужумчиси Келечи Ихеаначо. Бирлашган Араб Амирликларида бўлиб ўтган мундиалнинг энг ёрқин футболчиси. Турнирнинг энг яхши футболчиси. Мусобақа давомида ўз ҳисобига 6 та гол ва 7 та ассистни ёздириб қўйган футболчи, кейинчалик "Манчестер Сити" скаутлари назарига тушган эди. Бундан ташқари "Лестер"да ҳам етакчилардан бирига айланган эди.

Олтинчи  ўрин. "Манчестер Сити" афсоналаридан бири Давид Силва. Испания терма жамоаси билан 2003 йилги мундиалда энг ёрқин футболчиларидан бири сифатида мухлислар ёдида қолган эди. Мусобақада 4 гол урган ва 5 та голли узатмани амалга оширганди. Кейинчалик миллий терма жамоа билан 2 марта Европа чемпионатида ва бир маротаба Жаҳон чемпионатида ғалаба қозонган. Бундан ташқари, "Манчестер Сити" клубининг етакчиларидан бирига айланган эди.

Еттинчи ўрин. Келечи Нвакали. Виктор Осимхен тўпурар бўлган турнирнинг энг яхши футболчиси деб топилган Нвакали, мусобақада мобайнида 3 та гол урган ва 3 та голли узатмани ўз ҳисобига ёздириб қўйган эди. Жаҳон чемпионати якунланганидан сўнг Лондоннинг "Арсенал" клуби билан шартнома имзолаган эди.

Саккизинчи ўрин. Бразилия терма жамоаси вакили Андерсон. Перуда ўтказилган Жаҳон чемпионати қахрамонларидан бири, кичик мундиалда 5 та гол ва 4 та голли узатмани амалга оширган Андерсон, 3 йилдан сўнг энг яхши ёш футболчига бериладиган "Golden Boy" совринини ҳам қўлга киритади. "Манчестер Юнайтед" билан бирга Европа Чемпионлар лигаси ғолибига айланади.

Тўққизинчи ўрин. Лэндон Донован. АҚШ терма жамоаси афсонаси ва МЛСнинг энг яхши футболчиларидан бири ҳисобланади. Донован 1999 йилда Янги Зеландия майдонларида бўлиб ўтган турнирда терма жамоаси билан кумуш медалларига эга чиқди. Мусобақанинг энг ёркин футболчиларидан бири бўлиб, тўп жамоалар назарига тушган эди. Лэндон ушбу йирик турнирда 4 та гол урди ва 2 та голли узатмани амалга оширган эди.

Ўнинчи ўринда. Ўзбекистон ўсмирлар терма жамоаси аъзоси Амирбек Саидов. Ҳамюртимиз ўтган мундиалда ёрқин ўйинлар намойиш этди. Испания ва Канадага қарши кечган учрашувларда унинг голлари мухим очколар тақдим этган эди. Жаҳон чемпионатидан сўнг бир қатор йирик клублар унинг ўйинларини кузата бошлаган эди.

Қатарда ўтказилаётган Жаҳон чемпионатида ҳам бир қанча янги номларни кўришимиз мумкин. Айниқса, Бразилия, Германия, Франция каби юлдузлар ватанининг ўсмирлари, мундиал якунидан сўнг, катта клубларда кўрининг берса ажаб эмас.

 

Улуғбек Хошимов