Туркия Футбол Федерацияси 1024 нафар футболчининг ўйинларга пул тиккани расман эълон қилди

Туркия Футбол Федерацияси (ТФФ) ўзининг расмий сайти орқали футбол ўйинларига пул тикканлиги аниқланган 1024 нафар футболчининг исмини расман эълон қилди. ТФФ Ҳуқуқ қўмитасининг маълум қилишича, профессионал лигаларда олиб борилган тотализатор бўйича тергов доирасида “Галатасарой”дан Эрен Элмали ва Метехан Балтажи, “Бешиктош”дан Нежип Уйсал ва Эрсин Дестаноғлу, “Трабзонспор”дан Боран Башқан ҳамда Салих Малкочоғлу каби футболчилар ҳам бор.

Қимор ўйнагани аниқланган футболчилар интизом қўмитасига эҳтиёт чораси билан юборилган. Бундан ташқари, федерация расмий давлат идоралари билан ёзишмалар давом этаётганини, уларнинг жавобларига қараб тергов янада кенгайтирилишини маълум қилди.

ТФФ расмий баёноти:

“Туркия Футбол Федерацияси томонидан профессионал лигаларга оид олиб борилган тотализатор бўйича тергов доирасида қимор ўйнагани аниқланган 1024 нафар футболчининг Футбол интизом низомининг 57-моддасига мувофиқ 2025 йил 10 ноябрдан бошлаб эҳтиёт чораси билан Профессионал Футбол Интизом Қўмитасига (ПФДК) юборилишига қарор қилинди.

1024 нафар футболчининг эҳтиёт чораси асосида ПФДКга юборилиши сабабли, клублар таркибидаги бўшлиқларни тўлдириш учун фақат миллий даражада, 2025/2026 йилги мавсум қишки трансфер даврига қўшимча равишда 15 кунлик трансфер ва рўйхатдан ўтказиш муддати белгилаш бўйича ФИФА билан зудлик билан музокаралар бошланади.

ТФФ Ижроия қўмитасининг 2025 йил 10 ноябрдаги қарорига кўра,  2 лига ва 3 лига учрашувлари икки ҳафтага кечиктирилади. ТФФ Суперлига ва  1 лига учрашувлари эса аввал эълон қилинган тартибда давом этади.”

47 нафар футболчи бўйича махсус ҳолат:

Фақат бир марта тотализатор баҳсларида қатнашган 47 нафар футболчи ҳозирча интизом қўмитасига юборилмади. Улар бўйича иш расмий идоралардан келадиган ҳужжатлар асосида, янги далиллар пайдо бўлгач кўриб чиқилади.

Тотализаторга алоқадорлиги аниқланган Суперлига футболчилари:

"Бешиктош": Эрсин Дестаноғлу, Нежип Уйсал
"Аланьяспор": Иззет Челик, Енес Кескин, Юсуф Оздемир, Бедирхан Озйурт
"Ризеспор": Эфе Доған, Фуркан Орак
"Галатасарой": Метехан Балтажи, Еврен Эрен Элмали
"Газиантеп": Муҳаммет Таха Гюнеш, Назим Сангаре
"Гёзтепе": Иззет Фуркан Малак, Уғур Каан Йилдиз
"Антальяспор": Керем Каяараси
"Эюпспор": Мюкремин Арда Түркөз
"Касимпаша": Эге Албайрак, Али Емре Янaр
"Фатих Қарагумрук": Фуркан Беклевич, Керем Юсуф Сиркечи
"Самсунспор": Желил Юксел
"Трабзонспор": Боран Башқан, Салих Малкочоғлу
"Коньяспор": Адил Демирбағ, Алассана Ндао
"Кайсериспор": Беркан Аслан, Абдулсамет Буран

Хусусан, Туркия терма жамоасига чақирув олган, жорий мавсум Туркия Суперлигасида 11 учрашувда 3 та гол урган “Галатасарой” ҳимоячиси Эрен Элмали дарҳол Туркия қайдномасидан чиқарилди. Тотализаторчилар рўйхатида у ҳам бор эди.