Москванинг ЦСКА клубида ўйнаган собиқ футболчи Лайонель Адамс номаълум шахслар ҳужумига учраб, ўқотар қуролдан яраланган ва дўппосланган.
Маълумотларига кўра, собиқ профессионал футболчи Москва вилоятининг Звенигород шаҳрида жойлашган “ДеньНочь” буфетида ҳужум қурбонига айланган. Спортчига ўн нафар шахс ҳужум қилган. Жанжал аввало оғзаки тортишувдан бошланган, шундан сўнг бир киши футболчига ўқотар қуролдан ўқ узган, қолганлари эса Адамсни калтаклаган.
Тез тиббий ёрдам ходимлар воқеа жойига етиб келиб, биринчи ёрдам кўрсатишган, шундан кейин футболчи шифохонага ётқизилган. Шифохонада шифокорлар унинг сон қисмига ўқ текканини тасдиқлади.
Адамс ўз фаолиятини ЦСКАда бошлаган ва Россиянинг “Енисей”, “Волга” ҳамда “КАМАЗ” клубларида ўйнаган. Кейинчалик у Қозоғистон чемпионатига кўчиб ўтиб, бир қатор клублар, жумладан “Каспий” (Ақтау), “Турон” (Туркистон), “Жетису”, (Толдиқўрғон) ва “Шахтёр” (Қарағанда) жамоалари сафида тўп сурган.