Бу кузда америкача футбол бўйича “New York Giants” жамоси учун янги давр бошланади. Жамоага бош мураббий сифатида Жон Харбоу иш бошлаган ва янги мавсум олдидан кутилмалар анча юқори.
Бироқ NFL тақвимида нисбатан сокин давр бўлишига қарамай, жамоанинг икки етакчи ўйинчиси ижтимоий тармоқларда муҳокамалар марказига тушиб қолди.
22-май жума куни жамоанинг асосий квотербеки Жейкстон Дарт иштирок этган сиёсий митингдан видеолавҳалар интернетда кенг тарқалди. Унда Дарт саҳнага чиқиб, АҚШ президенти Дональд Трампни таништириб берган. Шундан сўнг Трамп уни саҳнада кутиб олган.
Орадан бир кун ўтиб, “New York Giants” ёш ҳимоячиси Абдул Картер мазкур видеога ижтимоий тармоқ орқали муносабат билдирди ва жамоадошининг қарорига шубҳа билан қараётганини англатди.
22-май жума куни Дарт иштирок этган митингдан лавҳалар ижтимоий тармоқларда тарқалганидан кейин Картер улардан бирини ўз саҳифасида қайта жойлаштирди ва қуйидагича изоҳ қолдирди:
“Бу нарсани сунъий интеллект ёрдамида қилинган деб ўйлагандим. Нима қиляпмиз ўзи?”
Видеода 23 ёшли Дарт саҳнага Survivor гуруҳининг машҳур “Eye of the Tiger” қўшиғининг инструментал версияси садолари остида таклиф қилингани акс этган.
У нутқини “Big Blue Nation”га мурожаат қилиш билан бошлади ва йиғилганлар билан биргаликда “Go Big Blue” шиорини айтди.
“Бу ерда бўлиш мен учун катта шараф ва катта имтиёз. Мен жуда миннатдорман ва фахрланаман. Америка Қўшма Штатларининг 45- ва 47-президенти Дональд Жей Трампни таништириб бериш мен учун катта бахт”, - деди Дарт.
23-май шанба куни Картер кейинчалик яна бир баёнот бериб, у билан Дарт ўртасида ҳеч қандай муаммо йўқлигини маълум қилди.
“Биз яхши муносабатдамиз. Эркакларча гаплашиб олдик”, - деб ёзди Картер.
Шу тариқа ижтимоий тармоқларда муҳокамаларга сабаб бўлган ҳолатга икки томон ҳам изоҳ берди ва вазиятни тинч йўл билан ҳал қилганини билдирди.
Жейкстон Дарт Дональд Трампни саҳнага таклиф қилганидан сўнг, АҚШ президенти уни қўл бериб кўришиш ва қучоқлашиш билан қарши олди.
Маълумотларга кўра, Трамп кейинчалик Дартни мақтаб, уни келажакдаги Шон-шараф зали (Hall of Fame) аъзоси, деб атади.
“У келажакда Шон-шараф залига кириши мумкин бўлган ўйинчи. Унда жуда катта истеъдод бор. У ажойиб йигит. Оёқлари дарахт танасидек бақувват, - деди Дональд Трамп.