“Тоттенхэм” супертрансферларни давом эттиради: Нишонда – “Сити” ҳужумчиси!

Ўтган мавсумдаги қониқарсиз натижалардан кейин “Тоттенхэм” клуби ёзги трансферлар ойнаси даврида таркибини сезиларли даражада кучайтиришга эътибор қаратмоқда.

Лондонликлар ҳозиргача қимматбаҳо трансферларни амалга ошириб, клубнинг харидлар бўйича рекордларини икки марта янгилаб бўлди.

Энди “шпорлар” ҳужум чизиғига янги ижрочи таклиф қилади. Айни пайтда  “Тоттенхэм” клуби “Манчестер Сити” ҳамда Миср миллий жамоаси ҳужумчиси Умар Мармушни ёзги трансферлар даврида асосий номзодлардан бири сифатида кўриб чиқмоқда.

Бу ҳақда Caught Offside нашри хабар берди.

Манбага кўра, “Манчестер Сити” 27 ёшли ҳужумчини тахминан 60 миллион еврога баҳоламоқда. Мармушга “Тоттенхэм”дан ташқари “Ювентус”, “Галатасарой” ва Германия Бундеслигасининг бир нечта клублари ҳам қизиқиш билдирмоқда.

Мармуш ўтган 2025/26 йилги мавсумда барча мусобақаларда 36 та учрашувда майдонга тушиб, 8 та гол урди ва 3 та голли узатмани амалга оширди. Унинг «Манчестер Сити» билан амалдаги шартномаси 2029 йил 30 июнга қадар мўлжалланган.