“Тоттенхэм” салкам юз миллион евро билан манчестерликларни доғда қолдирди

Лондоннинг “Тоттенхэм” клуби Англия Премьер-лигасини тарк этган “Вест Хэм” ярим ҳимоячиси Матеуш Фернандеш учун курашда ғолиб чиқди.

Инсайдер Дэвид Орнштейннинг X ижтимоий тармоғида маълум қилишича, “шпорлар” энг манфаатли таклифни берган. Аввалроқ 21 ёшли ярим ҳимоячига “Манчестер Юнайтед” ҳам қизиқиш билдиргани хабар қилинган эди.

Манба маълумотига кўра, “Тоттенхэм”нинг таклифи тахминан 85 миллион фунт стерлинг (99 миллион евро) миқдоридаги кафолатланган тўловни ўз ичига олади. Шунингдек, Фернандешнинг ўзи ҳам “Тоттенхэм” таклифини қабул қилишга қарор қилган. “Манчестер Юнайтед” қандай таклиф бергани ҳақида маълумот келтирилмаган.

Ўтган мавсумда Матеуш Фернандеш барча мусобақаларда 42 та учрашувда иштирок этиб, 5 та гол урди ва 5 та голли узатмани амалга оширди.