Тошкентда "KELES OPEN" халқаро турнири ўтказилди

Жорий йилнинг 21-22 июнь кунлари Тошкент тумани спорт мактабига қарашли "Универсал" спорт мажмуасида спортнинг каратэ WKF тури бўйича "Keles Open" олтинчи анъанавий халқаро турнири бўлиб ўтди.

Ўзбекистон Республикаси спорт вазирлиги, Тошкент вилояти спорт бошқармаси, Тошкент тумани ҳокимлиги, Ўзбекистон каратэ WKF ассоциацияси, Ёшлар ишлари агентлиги Тошкент тумани бўлими, Тошкент тумани спорт мактаби каби қатор ташкилотлар "Keles Karate" спорт клуби билан ҳамкорликда ўтказилган мазкур халқаро турнир юқори савияда ташкил этилди. 

Ўзбекистон Республикаси Президентининг 2023 йил 3 ноябрдаги ПҚ- 356 сонли "Каратэ (WKF) спорт турини янада ривожлантириш чора-тадбирлари тўғрисида"ги қарори ижросини таъминлаш ҳамда иқтидорли спортчиларни саралаш орқали терма жамоаларга муносиб номзодларни аниқлаш мақсадида ташкил этилган мазкур мусобақада мамлакатимизнинг барча ҳудудларидан ҳамда қўшни Қозоғистон ва Тожикистон давлатлардан 4 ёшдан 18 ёшгача ва 18 ёшдан катта бўлган 700 нафардан зиёд спортчилар ғолиблик учун кураш олиб боришди.

Муросасиз ва қизғин баҳсларга бой тарзда ўтган олтинчи анъанавий турнирни Тошкент тумани спорт мактаби мураббийи, "Keles Karate" спорт клуби раҳбари Дилшод Юсупов, мусобақа бош котиби Бекзод Абдулҳамидов, бош ҳакам Санжар Мақсудов, Тошкент вилояти бош мураббийи Хуршид Шодибековлар бошчилигидаги 30 нафар ҳакамлар гуруҳи бошқариб боришди.

Турнирнинг тантанали очилиш ва ғолибларни  тақдирлаш маросимида Тошкент тумани ҳокими Сардорбек Эргашев, ЎзДЖТСУнинг Жангавор яккакураш спорт турлари назарияси ва услубияти кафедраси мудири,  доцент Шуҳрат Арслонов, халқаро тоифадаги спорт устаси Комил Адилов ва бошқалар иштирок этди. Мусобақа доирасида Тошкент тумани ҳокими Сардорбек Эргашев томонидан халқаро мусобақаларда натижа кўрсатган Тошкент тумани ёш каратэчиларини ҳам  алоҳида табриклаб, уларга қимматбаҳо эсдалик совғалари топширди. 

Икки кун давом этган муросасиз беллашувларнинг якуний натижалирга кўра, умумжамоа ҳисобида фахрли биринчи ўринни Тошкент вилояти жамоаси қўлга киритди. Иккинчи ўринни Сирдарё вилояти жамоаси эгаллаган бўлса, иккита учинчи ўрин Тошкент шаҳар ва хоразмликларга насиб этди.
Мусобақада барча вазн тоифасига кўра ғолиб ва совриндорлар диплом, медаль ва қимматбаҳо эсдалик совғалари билан тақдирланишди.