- #Манчестер Сити
- #Ўзбекистон
- #Элдор Шомуродов
- #Ҳусниддин Алиқулов
- #Аббосбек Файзуллаев
- #Абдуқодир Ҳусанов
- #Ризеспор
- #Истанбул Башакшехир
Тезкор! Голлар ортидан Шомуродовнинг нархи “учди”, Файзуллаевники-чи?
- 5-март, 23:08
- Zohir Toshxo’jayev
- 0
- Футбол
Жаҳон футболидаги трансфер маълумотларига ихтисослашган нуфузли манба – Transfermarkt портали экспертлари Туркия Суперлигасида ўйнайдиган футболчиларнинг бозор қийматини янгилади.
Ўзбек футбол ишқибозлари жорий мавсумда асосан “Истанбул Башакшеҳир” жамоасига мухлислик қилмоқда. Чунки бу йил жаҳон чемпионатида илк маротаба иштирок этадиган Ўзбекистон миллик терма жамоаси етакчилари – Элдор Шомуродов ва Аббосбек Файзуллаев айнан Истанбул жамоасида тўп тепмоқда.
Шунингдек, Суперлигада яна бир вакилимиз – Ҳусниддин Алиқулов ҳам бор. “Ризеспор” ҳимоячиси оғир жароҳатга йўлиққан ва ҳозир даволаниш билан банд.
30 ёшли Элдор Шомуродов Туркия чемпионатининг ҳақиқий кашфиёти бўлди. “Рома”дан “Башакшеҳир”га кўчиб ўтган ҳужумчининг ишлари юришиб кетди ва дебют мавсумидаёқ Суперлига тўпурарига бериладиган “Олтин бутса” совринига даъвогарлик қилмоқда.
Шомуродов “Истанбул Башакшеҳир” сафида Туркия чемпионати ва мамлакат кубоги доирасида жами 28 та учрашувда майдонга тушиб, рақиблар дарвозасига 17 та тўп киритган. Бундан ташқари, чемпионат давомида жамоадошларига тўртта голли пас узатди.
Легионеримизнинг тўпурарлик маҳорати унинг трансфер нархига ижобий таъсир кўрсатди. Рим клубида ўйнаб юрган даврда Элдорнинг бозор қиймати 4 миллион еврогача тушиб кетганди. 2025 йилда Transfermarkt портали нархларни икки марта янгилади. 12 декабрдаги янгиланишда Шомуродовнинг нархи 5 миллион еврони ташкил этганди. Орадан уч ой ўтиб, Элдорнинг трансфер суммаси икки миллион еврога кўтарилди ва айни пайтда 7 миллион еврога етган.
Мавсум бошида янги жамоага мослашишга бироз қийналган Аббосбек Файзуллаевнинг нархида ўзгариш бўлгани йўқ. 22 ёшли ҳужумкор футболчимиз бугунги кунда ҳудди Шомуродовдек 7 миллион еврога баҳоланмоқда.
Ҳар икки легионеримиз “Истанбул Башакшеҳир”нинг энг қиммат ўйинчиларига айланди. Улардан кейинги ўринларни 5 миллион еврога баҳоланган ганалик легионер Жером Опоку ва марокашлик Амин Харит эгаллаган.
“Ризеспор”да етарли ўйин амалиётига эга бўлмаётган Ҳусниддин Алиқуловнинг нархи декабрь ойидаги кўрсаткич бўйича ўзгаришсиз қолган ва 1,5 миллион еврога баҳоланмоқда.
Ўзбекистон футболчиларининг умумий рўйхатида трансфер нархлари бўйича яққол етакчи Абдуқодир Ҳусанов ҳисобланади. “Манчестер Сити”нинг 22 ёшли марказий ҳимоячиси 35 миллион еврога баҳоланган ва нафақат Ўзбекистон, балки бутун Марказий Осиё минтақасининг энг қимматбаҳо ўйинчиси сифатида қайд этилган.
Ҳусановдан кейинги ўринларда айнан Элдор Шомуродов ва Аббосбек Файзуллаев жойлашган.
Бундан ташқари, Туркия чемпионатида иштирок этаётган собиқ иттифоқ ҳудудидан чиққан чарм тўп усталари орасида Элдор Шомуродов ва Аббосбек Файзуллаев трансфер нархи бўйича иккинчи кўрсаткичга эга. Бу борада нархи 2 миллион еврога кўтарилиб, 11 миллион еврога етган “Трабзонспор”нинг украиналик легионери Арсений Батагов етакчилик қилмоқда.