"TePe Sigeman 2026" 3-тур: Нодирбек Абдусатторов — Магнус Карлсен

Бугун бутун дунё шахмат ишқибозларининг эътибори айнан шу тахтага қаратилади. ТеПе Сигеман турнирининг 3-турида юртдошимиз Нодирбек Абдусатторов шахмат тарихидаги энг кучли ўйинчи Магнус Карлсенга қарши қора доналарда баҳс олиб боради. 
 
Магнус Карлсен — шахмат оламининг мутлақ афсонаси бўлиб, у 2882 рекорди билан тарихда энг юқори ЭЛО рейтингига эришган ва "космик" даражани ўрнатган ягона шахматчидир. 
 
2013 йилдан 2023 йилгача классик шахмат бўйича дунё тожини ҳеч кимга бермаган 5 карра жаҳон чемпиони, шунингдек, 2011 йилдан буён дунё рейтингида узлуксиз 1-ўринни эгаллаб, замонавий шахматда мислсиз 15 йиллик пешқадамликни намойиш этиб келмоқда. 
 
Бир вақтнинг ўзида классик, рапид (6 карра) ва блиц (9 карра) йўналишларида жаҳон чемпиони унвонини қўлга киритиб "Triple Crown" соҳибига айланган. 
 
Бундан ташқари, классик шахматда кетма-кет 125 та ўйинда мағлубиятга учрамай жаҳон рекордини ўрнатган ҳақиқий шахмат "қироли" ҳисобланади. 
 
Нодирбек Абдусатторов 2021 йилда айнан Магнусни мағлуб этиб, Рапид йўналишида жаҳон чемпионига айланган эди. 
 
Маълумот ўрнида, 3-тур баҳслари 18:00’да бошланади.