Теннисда катта можаро – Жокович жим турмади: Бирлашмасак, оқибати оғир бўлади!

2026 йилги Франция очиқ чемпионати мукофот пуллари бўйича теннисчилар ва турнир ташкилотчилари ўртасидаги баҳслар фонида старт олди. Шу муносабат билан сербиялик теннисчи Новак Жокович ўз позициясини маълум қилди.

Рекорд даражадаги 25-турнир “Катта дубулға” чемпионлиги учун курашаётган Жокович якшанба куни франциялик Жованни Мпетши Перрикарга қарши майдонга чиқишидан олдин матбуот анжуманида мазкур норозилик ҳаракатида иштирок этмаётганини таъкидлади.

Сўнгги кунларда “Ролан Гаррос”да теннисчилар ўзига хос медиа бойкотни бошлади. Улар матбуот анжуманларини 15 дақиқа билан чеклаб, қўшимча интервьюлар беришдан бош тортмоқда.

Бу рақам тасодифий эмас. Айни пайтда Франция очиқ чемпионати даромадининг тахминан 15 фоизигина мукофот жамғармаси сифатида теннисчиларга ажратилади.

Турнир ташкилотчилари 2026 йил учун мукофот жамғармасини 9,5 фоизга ошириб, 61,7 миллион еврога етказган бўлса-да, ўтган йили мусобақанинг умумий даромади 395 миллион еврога чиққан. Шунга қарамай, теннисчиларга ажратилган улуш атиги 14,3 фоизни ташкил қилган.

Шу сабабли спортчилар “Катта дубулға” турнирлари 2030 йилгача мукофот жамғармасига умумий даромаднинг 22 фоизини ажратишини талаб қилмоқда. Шунингдек, улар пенсия, тиббий суғурта ва оналик дастурларига ажратиладиган маблағларни ҳам оширишни сўрамоқда.

Мазкур ҳаракатни дунёнинг биринчи ракеткалари — Аринa Соболенко ва Янник Синнер, шунингдек Коко Гофф, Ига Швёнтек, Тейлор Фритц ва Андрей Рублёв каби теннисчилар қўллаб-қувватламоқда.

Кўпчилик Жокович ҳам ушбу ташаббус ташкилотчиларидан бири деб ҳисоблаган эди. Бироқ сербиялик теннисчи бундай эмаслигини айтди.

- Мен бу жараённинг бир қисми бўлмаганман. Музокаралар, режалаштириш ёки қарор қабул қилиш жараёнида қатнашмадим. Шунинг учун бу ҳақда аниқ фикр билдиришим қийин, -  деди Жокович.

Шунга қарамай, у рейтингда юқори ўринларда бўлмаган теннисчиларнинг молиявий аҳволи ҳақида қайғуришда давом этишини таъкидлади.

- Эркаклар ва аёллар ўртасида паст рейтингда турган кўплаб теннисчилар кўпинча эътибордан четда қолади. Бу спорт орқали ҳақиқатан ҳам тирикчилик қилаётганлар сони қанчалик кам эканини унутиб қўямиз. Мен бу ҳақда гапиришдан ҳеч қачон тўхтамайман, чунки бу профессионал тенниснинг энг муҳим масалаларидан бири, - деди у.

Жоковичнинг фикрича, спортдаги бўлиниш вазиятни янада мураккаблаштириши мумкин.

У мисол сифатида PGA Tour ва LIV Golf ўртасидаги кўп йиллик зиддиятни келтирди.

- Тенниснинг тузилиши ва бошқарув тизими аллақачон етарлича мураккаб. Янада бўлиниш шахсан менга оғир таъсир қилмоқда. Гольфдаги вазиятдан сабоқ олишимиз керак. Спортимиз учун яхшироқ тузилма ва яхшироқ келажак топиш мақсадида бирлашишимиз лозим, - деди сербиялик юлдуз.

Жокович барча томонлар яқин вақт ичида ўзаро келишувга эришишига умид билдирган ҳолда эътиборини яна кортдаги ўйинларга қаратишини маълум қилди.

Якшанба куни у “Ролан Гаррос”нинг марказий корти – “Филипп Шатрье” аренасида маҳаллий вақт билан соат 20:15 да ўзининг турнирдаги илк учрашувини ўтказади.