Тайсон Фьюри ва Энтони Жошуа жангини ўтказиш учун саҳна ортида катта кураш кетмоқда

Таниқли промоутер Эдди Хирннинг таъкидлашича, у ва Энтони Жошуа ҳали ҳам Тайсон Фьюрига қарши ноябрь ойига мўлжалланаётган супержангни айнан Буюк Британияда ўтказиш учун курашмоқда. Илгари баҳс деярли аниқ Нью-Йоркда, машҳур "Madison Square Garden" аренасида бўлиб ўтиши ҳақида хабарлар тарқалган эди. Турки Ал аш-Шейх ва трансляция ҳуқуқларига даъвогар Netflix платформаси ҳам АҚШ вариантини қўллаб-қувватламоқда, чунки бу ерда томошабинлар аудиторияси анча катта бўлишига ишонишяпти.

Маълумотларга кўра, жангни ўтказиш ҳуқуқи учун курашаётган бир нечта компанияларнинг аксарияти аллақачон Нью-Йорк вариантига тўхталган.

Бироқ Жошуа томони билан тузилган дастлабки шартномада ушбу тўқнашув Буюк Британияда ўтиши алоҳида қайд этилган. Хирн узоқ ва мураккаб музокаралар бошиданоқ шу бандга урғу бериб келмоқда. Фьюри шартномасида эса бундай талаб кўрсатилмаган. Бир муддат мазкур қарама-қаршилик Лондоннинг машҳур "Уэмбли" стадионида бўлиб ўтиши муҳокама қилинганди. Аммо Турки Ал аш-Шейхга бу вариант ёқмади.

"Zuffa Boxing" раҳбари Дана Уайт ҳам бу масала юзасидан бир неча бор фикр билдирган. У ўзини ушбу катта бокс кечасининг промоутери сифатида кўраётганини айтиб, жанг қаерда бўлишини анча олдиндан билишини таъкидлаб келмоқда. 

Хирн эса, Жошуа жамоаси Нью-Йоркда жанг қилиш имкониятини мутлақо рад этмаганини қайд этар экан, икки британиялик Америкада рингга кўтарилиши учун мижозининг шартномасини қайта кўриб чиқиш ва ўзгартириш талаб этилишини яна бир бор эслатди.