Суперлиганинг биринчи даврасида қайси клублар мураббийларни алмаштирди? Истеъфо сабаби нимада?

Суперлигада биринчи давра аллақачон якунланган. Юзага келган танаффусдан фойдаланиб футболимизга оид маълумотлар, мақолалар ва материллар бериб борамиз.

Иккита ўйинни инобатга олмаса чемпионатимизнинг биринчи даврасига белгиланган ўйинлар ўтказилди. Аммо биринчи давранинг ўзиданоқ мураббийга чиқиш эшикларини кўрсатганлар ҳам бор. Айни пайтга келиб 5 та клуб бош мураббийни ўзгартирди.

Биринчи истеъфо 

Шуҳрат Мақсудов “Бунёдкор”

Шартнома муддати - кўрсатилмаган

Жамоага келган вақти - 2021 йил, 3 март

Жамоадан кетган вақти - 2022 йил, 11 май

Суперлига 8-турида “Бунёдкор” ўз майдонида “Металлург” билан дуранг ўйнади. Орадан 3 кун ўтиб клуб матбуот хизмати жамоа мураббийи ўзгарганини маълум қилди.

6-турда “Олимпик”ка ютқазган “Бунёдкор” клуб тарихидаги энг йирик ҳисобдаги мағлубиятга учраган эди (1:5). Мазкур муваффақиятсизликдан кейин клуб раҳбарияти мураббийлар штаби олдига “Навбаҳор”га қарши навбатдаги баҳсда ғалаба қозониш вазифасини қўйди. Гарчи Наманганда мағлубиятга учралган бўлса-да, мезбонлар билан беллашувда “қалдирғочлар” мазмунли ўйин ва муносиб қаршилик кўрсата олганларидан келиб чиқиб, мураббийлар штабига яна имконият берилганди. Бироқ 8-турда “Металлург” билан куч синашган “Бунёдкор” яна муҳим очколарни бой берди. Учрашувдан сўнг клуб раҳбарияти томонидан мураббийлар штабида ўзгаришлар амалга ошириш бўйича қарор қабул қилинди.

Шундан сўнг бош мураббий Шуҳрат Мақсудов, мураббий Арам Ананян ва дарвозабонлар мураббийи Абдусаттор Раҳимов ўз лавозимларини тарк этишди. Шу кунга қадар бош мураббий ассистенти бўлиб ишлаб келган Виктор Карпенко бош мураббий вазифасини бажарувчи этиб тайинланди.

Иккинчи истеъфо 

Предраг Роган “Динамо”

Шартнома муддати - 1 йил

Жамоага келган вақти - 2022 йил, 8 январь

Жамоадан кетган вақти - 2022 йил, 20 май

20 май куни «Динамо» қароргоҳида клуб раҳбарияти ҳамда жамоа иштирокида йиғилиш ўтказилди. Унда жамоанинг охирги турларда қайд этган қониқарсиз натижалари атрофлича муҳокама қилиниб, клуб бош мураббийи Предраг Роган билан дўстона хайрлашилгани маълум бўлди. Сербиялик мутахассис билан бирга унинг ёрдамчиси Иван Йевич билан ҳам ҳамкорлик тўхтатилди. «Динамо» ПФК ҳамда мураббийлар ўртасидаги шартнома икки томонлама бекор қилинди.

Клуб раҳбарияти қарорига кўра, «Динамо» жамоаси бош мураббийи этиб шу пайтга қадар клуб спорт директори лавозимида фаолият юритган Андрей Шипилов тайинланди. Андрей Сергеевич бунгача «Пахтакор» мураббийлар штаби ва «Металлург» клуби бош мураббийи сифатида фаолият юритган.

Учинчи истеъфо 

Илҳом Мўминжонов “Нефтчи”

Шартнома муддати - 4 йил

Жамоага келган вақти - 2021 йил, 2 январь 

Жамоадан кетган вақти - 2022 йил, 2 июль

"Нефтчи" клуби 2022 йил Суперлига учрашувларида ўз имкониятларидан оқилона фойдалана олмай, кетма-кет мағлубиятларга учраганлиги ва турнир жадвалида охирги ўринлардан бирига тушиб қолганлиги, раҳбарият ва мухлислар ишончини оқлай олмаганлиги боис, жамоа бош директори Зоҳид Ғофуров ҳамда бош мураббий Илҳом Мўминжонов эгаллаб турган лавозимларидан озод этилиб, истеъфога чиқарилди.

"Нефтчи"нинг янги бош мураббийи тожикистонлик Виталий Левченко. УЕФАнинг ПРО лицензиясига эга мутахассис 2005 йилдан бери мураббийлик фаолияти билан шуғулланиб келмоқда. “Нефтчи”ни қабул қилишдан аввал Душанбенинг “Истиқлол” жамоасини бошқарган. 2021 йили Осиё Чемпионлар лигасидаги дебют мавсумида гуруҳ баҳсларида биринчи ўринни эгаллаб, жамоасини 1/8 финалга олиб чиққан.

Тўртинчи истеъфо 

Славче Войнески “Пахтакор”

Шартнома муддати - 1 йил 

Жамоага келган вақти - 2022 йил, 11 январь 

Жамоадан кетган вақти - 2022 йил, 6 июль

Шимолий македониялик мутахассис Славче Войнески билан "Пахтакор" ўртасидаги шартнома муддатидан олдин бекор қилинди. Клуб ва мураббий ўртасидаги битим икки томон келишувига кўра шундай қарорга келинди.

Бундай фикрга келинишининг сабаби жамоанинг Осиё Чемпионлар лигасида гуруҳда қолиб кетиши қониқарсиз, деб топилган. Қолаверса, клуб раҳбарияти “шерлар”нинг Суперлигадаги иштирокидан кўнгли тўлмаган. 

Шундан сўнг июнь ойидан бери "Пахтакор"да спорт директори сифатида ишлаб келаётган Максим Шацких жамоа бош мураббийи этиб тайинланди.

Футбол билан шуғулланишни "Пахтакор" футбол мактабида бошлаган Шацких ва клуб ўртасида уч йиллик шартномага имзо чекилди.

Бешинчи истеъфо 

Бахтиёр Ашурматов “Қўқон-1912”

Шартнома муддати  - кўрсатилмаган

Жамоага келган вақти - 2019 йил, 9 декабрь 

Жамоадан кетган вақти - 9 июль, 2022 йил

Шу кунга қадар “Қўқон-1912” жамоасини бошқарган Бахтиёр Ашурматов истеъфога чиқди. Клуб ҳамда мураббий ўртасидаги битим икки томоннинг розилигига кўра бекор қилинди.

Бахтиёр Ашурматов 2019 йилнинг сўнггида жамоа бош мураббийига айланганди. 2020 йилги мавсумда қўқонликлар ўз тарихидаги энг юқори натижани такрорлади. Ашурматов бошчилигидаги “шунқорлар” Суперлигада  5-ўринни қўлга киритди.

Аммо бу мавсум Ашурматов бошчилигидаги жамоанинг ишлари кўнгилдагидек эмасди. Жамоа 13 ўйинда 12 очко жамғариб, хавфли ҳудудда бораётганди. Бу эса қўқонликларни ҳавотирга солди ва бош мураббий ўзгариши кераклигига сабаб бўлди.

Шу кунга қадар мураббийлар штабида ишлаб келган таниқли мутахассис Даврон Файзиев жамоа бош мураббийи этиб тайинланди.

 

Бекзод ИСАЕВ тайёрлади