Суперклуб: Учалангнинг маошинг ошади

Англия Премьер-лигасида пешқадамлик қилаётган “Арсенал” раҳбарияти жамоанинг уч нафар етакчи футболчиси билан амалдаги шартноманинг муддатини узайтиришга қарор қилди.

Лондонликлар маоши ошадиган футболчилар рўйхатига ҳужумчи Букайо Сака, ҳимоячи Юррьен Тимбер ва ҳужумкор ярим ҳимоячи Деклан Райсни киритди. Уларнинг бари қимматбаҳо ўйинчилар ҳисоблангани билан Европанинг бир неча бадавлат клублари нишонида турибди.

Букайо Саканинг клуб билан ҳамкорлиги 2027 йилнинг ярмигача давом этиши белгиланган. Сака клуб тарбияланувчиси ҳисобланади ва 2019 йилдан бери асосий таркибда тўп тепиб келяпти. Унинг ҳозирги нархи 140 миллион еврога баҳоланган.

Икки йил муқаддам “Аякс”дан 40 миллион евро эвазига олиб келинган Юррьен Тимбер билан ўшанда беш йиллик битим имзоланган. Шундан бери нархи 60 миллион еврога кўтарилган ҳимоячи билан ҳамкорлик узоқроқ муддатга узайтирилиши кутиляпти.

Деклан Райс “Вест Хэм”даги ўйинлари орқали Англиянинг энг зўр ярим ҳимоячиларидан бири даражасига кўтарилган. 2023 йили бу ўйинчи учун “канонирлар” 116,6 миллион евро тўлаган. Райснинг шартномаси 2028 йилнинг ярмигача давом этади. Унинг трансфер бозоридаги қиймати 120 миллион еврони ташкил қиляпти.