Сречко Катанец: "Машариповни тушунаман, мен ҳам футболчилик пайтимда кўпинча шундай қилардим"

Осиё Кубоги-2023 3-саралаш босқичи сўнгги тури доирасидаги Ўзбекистон - Таиланд учрашувида мезбонлар 2:0 ҳисобида зафар қучди. Беллашувдан сўнг "оқ бўрилар" бош мураббийи Сречко Катанец матбуот анжуманида иштирок этди:

"Бугун жамоам жуда ҳам яхши ўйин кўрсатди, бунинг учун футболчилардан миннатдорман. Тўғри, бизда ўртоқлик учрашувларида ҳам яхши ўйин ва натижалар бўлган эди. Лекин айнан бугун мен жамоамни кўрсатган ўйинидан тўлиқ қониқдим.

Биз яхши прессинг қилдик, учрашув давомида темпни ушлаб турдик, футболчилар максимал даражада тартибли ўйин намойиш этишди.

Осиё кубогигача ФИФА кунларидан унумли фойдаланиб, кучли рақиблар билан ўйин ўтказишга ҳаракат қиламиз.

Жалолиддин Машарипов алмаштирилганидан сўнг бироз норози бўлди, бу нормал ҳолат. Ҳар бир футболчи кўпроқ ўйнашни хоҳлайди. Ўзим ҳам футболчилик давримда кўпинча шундай қилардим. Ҳамманинг характери ҳар хил. Уни ҳам тушунаман. Лекин мен мураббийман, баъзида ўйинга ўзгартириш киритиш учун лидерларни ҳам, хусусан, Машарипов ёки Шомуродовни ҳам алмаштиришга мажбурман. Бунда ҳеч қандай муаммо йўқ.

Биз 4-4-2 схемасини рақибга қараб танладик. Ҳар бир рақибга қараб бу жойлашув ўзгариб бориши мумкин".