Спортчиларни "қон савдогарлари"дан қутқариш керак!

Польшалик тажрибали боксчи Мариуш Вах (39-14, 20 КО) ўтган дам олиш кунларида ММА қоидалари асосида жанг ўтказди. Бу беллашувда у бир вақтнинг ўзида олти нафар рақибга қарши октагонга тушди. Бироқ ушбу ноодатий жанг бокс оламида катта баҳс-мунозараларга сабаб бўлмоқда. Айниқса, мазкур баҳсдан уч ҳафта олдин Вах собиқ жаҳон чемпиони Тайсон Фьюрига қарши етти раундлик беллашув ўтказгани ва ўша пайтнинг ўзида жангни давом эттиришдан бош тортгани эътирозларни янада кучайтирди.

Мазкур вазият юзасидан дунё бокс жамоатчилигида катта нуфузга эга промоутер Лу Дибелла ҳам ўз фикрини билдириб ўтди. 

"Кўплаб спортчилар, жумладан Мариуш Вахни қондан фойда кўрувчи савдогарлардан ҳам ҳимоя қилиш керак. Умуман олганда, бу одам Фьюрига қарши рингга чиқмаслиги керак эди. Қолаверса, шундан уч ҳафта ўтиб, 1га 6 жангда қатнашиши мутлақо мантиққа тўғри келмайди. У — чарчаган, спорт формасини йўқотган, ўрта ёшдан ўтган эркак. Бокс ва жанг санъати яна бир бор шуни кўрсатмоқдаки, бу соҳада "қуйи чегара" деган тушунча йўқ, хавф-хатарнинг ҳам ҳадди-бисоти белгиланмаган. Томошабинлар эса одоб-ахлоқ чегаралари қандай қилиб тобора пастга тушаётганини бефарқлик билан кузатишда давом этмоқда", — дея танқид қилди Дибелла. 

Мутахассислар таъкидлашича, муайян ёшдан кейин профессионал ринг ёки октагонда қолиш масаласи ҳазил ёки шоу эмас, балки жиддий соғлиқ ва хавфсизлик муаммосига айланади. 

Интернетда тарқалган видеоларда Мариуш Вахнинг 1га 6 ММА жангида қаттиқ зарбаларга дуч келгани кўриниб турибди.