Собиқ футболчи "Реал" ҳужумчисини "Арсенал"да кўришни истамоқда

Франциялик собиқ футболчи Эммануэль Пети "Лион"да ижара асосида тўп сураётган Эндрик ўйини ҳақида ўз фикрларини билдирди.

19 ёшли ҳужумчи январь ойида ўйин амалиёти олиш мақсадида Францияга йўл олган ва ҳозирча жуда яхши таассурот қолдирмоқда. Унинг "Реал"га қайтгач асосий таркибдан жой олиши-олмаслиги эса ҳозирча номаълум.

"Эндрик жуда иқтидорли, лекин баъзида у худди ёввойи отдек бошқариб бўлмайди. Айрим пайтларда майдонда ҳаддан ташқари худбинлик қилади, аммо унинг улкан салоҳияти аниқ кўриниб турибди. Бу йигит — ҳақиқий бриллиант, унга тўғри муҳит керак. Унинг сифатларини ҳисобга олган ҳолда, мен уни "Арсенал"да кўришни истардим", — деди Пети.

Маълумот учун, Эндрик "Лион" сафида 19 та ўйинда майдонга тушиб, 8 та гол ва 7 та голли узатма муаллифи бўлди.