“Сити”нинг яна бир машҳур юлдузи кетади

“Манчестер Сити” келаси мавсум олдидан таркибдаги ёши катта футболчиларнинг кетишига йўл очиб бермоқда. Кайл Уокер ва Кевин де Брюйне каби таниқли ўйинчилардан кейин Илкай Гюндоған ҳам “шаҳарликлар” билан хайрлашадиган бўляпти.

Журналист Яғиз Сабунжуўғлининг маълум қилишича, 34 ёшли ярим ҳимоячи “Галатасарой”га ўтишга жуда яқин турибди.

Манбага кўра, турк клуби раҳбарияти ҳам, германиялик футболчи ҳам ўзаро ҳамкорлик қилиш истагини билдирган.

Шу ўринда, Гюндоған Саудия Арабистони клубларидан расмий таклиф олганини ҳам айтиш лозим. Бироқ тажрибали чарм тўп устасининг ўзи Туркия вариантини маъқул кўряпти.

Гюндоған манчестерликлар сафида 2016 йилдан бери тўп тепади. Орада бир мавсум “Барселона”дан ўйнаб келганидан кейин яна Хосеп Гвардиола жамоасига қайтиб келган эди.

Манчестерликлар билан яна бир йиллик шартномаси бор футболчи 5 миллион еврога баҳоланмоқда. Бу суммани тўлаш турк клубига ҳеч қандай муаммо туғдирмайди.