“Сити”дан кетганимдан афсусландим!

Испаниялик машҳур ҳимоячи Эмерик Лапорт “Манчестер Сити”даги фаолияти ривожланиб бораётган паллада клубдан кетиб қолгани хато бўлганини тан олди.

Марказий ҳимоячи сифатида Хосеп Гвардиола ишончини қозонган Эмерик Лапорт Европадаги юлдузлар Саудия Арабистонига кетаётган даврда “Ан-Наср”га ўтган эди.

2023 йилнинг ёзида “Манчестер Сити” беш йил тўп сурган Лапортни сотиб юборишига тўғри келган.

- Мен кетганимга афсусландим, чунки мен дунёнинг энг яхши клубида эдим. У ерда футболчиларга қандай ғамхўрлик қилишлари, бу ноёб ҳолат. Вақт ўтиб бунга ўрганиб қоласан ва оддий нарса, деб қабул қиласан, аммо кетганингдан кейин бу қанчалик ажойиб бўлганини тушуна бошлайсан.

Мен “Манчестер Сити”дан чин дилдан миннатдорман. Бу клуб ҳақида бирор ёмон гап айта олмайман. Мен учун унутилмас тажриба бўлди, ҳаётимдаги энг яхши даврлардан бири шу жамоада ўтган, - деди Лапорт.

Эслатиб ўтамиз, Лапортнинг Саудия Арабистонидаги фаолияти узоқ давом этмади. Тажрибали футболчи 2025 йилнинг ёзида ўзи илгари ўйнаган Бильбаонинг “Атлетик” жамоаси сафига бориб қўшилди.