“Сити”дан 60 очко олиб ташланиши мумкин

Англиянинг «Манчестер Сити» клуби молиявий қоидабузарликлар сабаб 60 очкодан маҳрум қилиниши мумкин. Бу ҳақда talkSPORT журналисти Алан Бразил хабар берди.

Унинг маълумотларига кўра, бундай жазо муросали ечим сифатида кўрилмоқда: у кўпчиликни қаноатлантириши, шу билан бирга, «шаҳарликлар»га Премьер-лигада қолиш имкониятини расман сақлаб бериши мумкин.

Бироқ Бразил бу қарор жорий мавсумдаёқ кучга киришига шубҳа билан қарамоқда. Унинг фикрича, муддатлар бунга имкон бермаслиги мумкин ва жазо кейинги мавсумга қолдирилиши эҳтимолдан холи эмас.

Унинг ҳамкасби Элли Маккойст эса мухлисларнинг бир қисми янада қаттиқроқ жазо кутаётганини таъкидлади. Шу билан бирга, у 60 очко олиб ташланган тақдирда ҳам, клубнинг лигадаги ўрнини йўқотиши математик жиҳатдан муқаррар бўлмаслигини қайд этди. Агар Премьер-лигада қолиш учун 37–39 очко тўплаш кифоя қилса, «Манчестер Сити»да омон қолиш учун курашиш имконияти бўлади. Бундай вазиятда асосий футболчилар буни спорт чақируви сифатида қабул қилиб, жамоани тарк этмасликлари мумкин.

Айни пайтда «Манчестер Сити» беш турдан кейин 15 очко билан турнир жадвалида биринчи ўринда бормоқда. Иккинчи ўринда 12 очко тўплаган «Арсенал» жойлашган.