“Сити” юлдузига қудратли харидор чиқди, ушлаб қолиш қийин бўлади

Бундеслиганинг энг қудратли клуби “Бавария” раҳбарияти жамоа таркибини сезиларли даражада кучайтириш мақсадида “Манчестер Сити” ҳужумкор футболчиси Фил Фоденга жиддий қизиқиш билдирмоқда.

Мюнхен клуби аллақачон футболчининг вакиллари билан боғланган.

Шу билан бирга, “Манчестер Сити” Фоденни ўз таркибида олиб қолиш учун барча имкониятларни ишга солмоқда.

Бу ҳақда TEAMtalk хабар берди.

Ҳозирда инглиз клуби раҳбарияти Фоден билан янги шартнома бўйича музокараларни фаоллаштирган.

“Манчестер Сити” хўжайинлари “Бавария”нинг футболчига билдириаётган қизиқишидан хабардор ва футболчини янги шартнома имзолашга кўндириш орқали муаммолардан қочмоқчи.

Фоден Манчестерда қолишга қарши эмас, бироқ у амалдаги шартномасига нисбатан яхшироқ шартларни талаб қилмоқда.

Манбага кўра, “шаҳарликлар” раҳбарияти футболчини жамоада сақлаб қолиш учун эҳтимол унга ён беради.

Фил Фоден “Манчестер Сити” академияси тарбияланувчиси бўлиб, у 2017 йилда клуб ёшлар жамоасидан асосий таркибга ўтган.

Жорий мавсумда у “шаҳарликлар” сафида 41 та ўйин ўтказиб, 10 та гол урди ва 5 та голли узатма берди. Унинг шартномаси 2027 йил ёзигача амал қилади, бозор қиймати эса Transfermarkt баҳосига кўра 80 миллион еврони ташкил этади.