“Сити” Холандни “Реал”га қўйиб юборадими?

“Манчестер Сити” раҳбарияти норвегиялик ҳужумчи Эрлинг Холанднинг ёзда “Реал” клубига ўтиши мумкинлиги ҳақидаги хабарларга мутлақо хотиржам муносабатда бўлмоқда. Чунки клуб яқин вақт ичида унинг трансферини кутмаяпти.

Бу ҳақда журналист ва инсайдер Фабрицио Романо Х ижтимоий тармоғида маълум қилди.

Манба маълумотига кўра, “шаҳарликлар” Холанд жамоада қолишига ишонмоқда ва футболчидан кетиш истаги ҳақида ҳеч қандай сигнал олмаган.

Шунингдек, Холанд клуб лойиҳасининг асосий қисми ҳисобланади. Бу ҳатто бош мураббийликка Энцо Мареска тайинланган тақдирда ҳам ўзгармайди.

Аввалроқ, “Реал” президенти лавозимига номзод Энрике Рикельме 7 июнь куни бўлиб ўтадиган сайловда ғалаба қозонса, Холандни клубга олиб келишини ваъда қилган эди.

Ўтган мавсумда Холанд барча мусобақаларда 52 та ўйинда қатнашиб, 38 та гол ва 9 та голли узатма муаллифи бўлди.