“Сити” АПЛдан четлатилса, Холандни “улкан суммага” сотиб кетади

«Манчестер Сити» молиявий қоидаларни бузгани учун Англия Премьер-лигасидан четлатилган тақдирда ҳам, ҳеч бир топ-клуб унинг ҳужумчиси Эрлинг Холандни текинга қўлга кирита олмайди. Бу ҳақда Football Insider хабар берди.

Манбага кўра, норвегиялик ҳужумчининг шартномасида «Манчестер Сити» АПЛдан чиқариб юборилган тақдирда шартномани муддатидан олдин бекор қилиш имконини берувчи банд мавжуд эмас.

Бу футболчининг эҳтимолий кетиши учун яна бир вариантни истисно қилади. Шу билан бирга, «шаҳарликлар» клуб чемпионатдан четлатилса, Холанд жамоада қолиб, унинг элитага қайтишига ёрдам бермаслигини тушуниб турибди.

Қайд этилишича, «Манчестер Сити» 26 ёшли футболчи билан 2034 йилга қадар мўлжалланган узоқ муддатли шартнома орқали ўз позициясини ҳимоя қилган.