Шу юлдузни олинглар! “Барса” жаҳон чемпионидан қутилмоқчи

«Барселона»нинг ҳужумкор футболчиси Дани Ольмо Англия Премьер-лиганинг «катта олтилик» клубларига таклиф қилинди.

Ольмо «Барселона» бош мураббийи Ханси Флик учун муҳим футболчи бўлиб қолмоқда. Бироқ каталонияликлар шу позицияда ҳаракат қиладиган Фермин Лопесга ҳам катта умид боғламоқда. Шу билан бирга, клуб таркибнинг бошқа муаммоли позицияларини кучайтириш учун молиявий маблағга эҳтиёж сезмоқда.

TEAMtalk маълумотига кўра, «Барселона» январь ойида Ольмо бўйича таклифларни кўриб чиқишга тайёр эканини билдирган. Воситачилар орқали 28 ёшли Испания терма жамоаси футболчисининг хизматлари «Арсенал», «Челси», «Ливерпуль», «Манчестер Сити», «Манчестер Юнайтед» ва «Тоттенхэм»га таклиф қилинган.

Ольмо учун «Барселона»да қолишдан ташқари Саудия Арабистонига кўчиб ўтиш ҳам эҳтимолий вариант сифатида тилга олинмоқда. Испаниялик футболчи ўтган Ла Лига мавсумида 33 та учрашувда 7 та гол урган ва 8 та голли узатма амалга оширган.