Шохруҳ Гадоев: "Нефтчи"га келишимга Левченко ва Ирисметовнинг таклифлари сабаб бўлди"

"Нефтчи" билан шартнома имзолаган ярим ҳимоячи Шохруҳ Гадоев клуб матбуот хизматига дастлабки фикрлари билан ўртоқлашди.

"Фарғонанинг "Нефтчи" клуби ҳақида ёшлигимданоқ кўп нарсаларни эшитганман. Бу жамоа Ўзбекистоннинг етук клуби сифатида беш марта мамлакат чемпиони бўлган. Бир неча марта кумуш ва бронза медаллари ҳамда Ўзбекистон Кубоги соҳиби даражасига кўтарилган. Осиё чемпионлар лигаси мусобақаларида қатнашиб, мамлакатимиз шарафини ҳимоя қилган. 

"Нефтчи"га келишимга жамоа бош мураббийи Виталий Левченко ва менежер Жаъфар Ирисметовнинг таклифлари сабаб бўлди. Мен уларнинг таклифларини қувонч билан қабул қилиб, бутун вужудим билан Фарғонага интилдим. 

Янги мавсумда "Нефтчи" сафида совринлар учун астойдил курашаман. Бу курашда бизни севимли мухлисларимиз ўн иккинчи ўйинчи сифатида доимо қўллаб-қувватлаб туришларига ишонаман. Шу боис уларга ва оила аъзоларига мустаҳкам саломатлик,қувонч ва омадлар тилайман", - дейди Гадоев.