Шомуродовга янги ва яхши даъвогар чиқди!
- 28-декабр 2024, 23:55
- Zohir Toshxo’jayev
- 1
- Футбол
Италиядаги ягона вакилимиз - Ўзбекистон миллий терма жамоаси ва энг зўр тўпурари Элдор Шомуродовнинг “Рома”даги келажаги ҳамон мавҳум бўлиб турибди.
Рим клуби январь ойидан бошлаб таркибда жиддий ўзгаришлар қилишга бел боғлаган. Хусусан, бош мураббий Клаудио Раньери янги марказий ҳужумчи кутяпти. Клуб мутасаддилари бир неча Распадори ва Бето каби форвардларни олиб келиш вариантларини кўриб чиқмоқда. Бошқа номзодлар ҳам йўқ эмас, албатта.
“Рома” биринчи навбатда, беш нафар футболчи билан хайрлашишни режалаштирмоқда. Рўйхатга Элдор Шомуродов, Лоренцо Пеллегрини, Марио Эрмосо, Зеки Челик, Брайан Кристанте каби тажрибали ўйинчилар киритилган.
Аслида ҳар трансфер бозори атрофида Элдор Шомуродов масаласи кўтарилади. Легионеримиз римликлар асосий таркибда муқим жойига эга эмас. Бироқ маҳоратли ва тажрибали форвардни ҳар трансфер мавсумида бир неча клублар ижарага олишга ҳаракат қилиб келади.
Жорий мавсум давомида 29 ёшли ўзбек ҳужумчисига А Серия дебютанти “Комо” ва В Серияда қолиш учун курашаётган “Салернитана” қизиқиш билдираётгани ҳақида маълумотлар тарқатилган эди. Энди даъвогарлар рўйхати кенгая бошлади.
L'Unione Sarda нашрининг ёзишича, “Кальяри” раҳбарияти ўтган мавсум жамоада ўйнаб кетган Элдор Шомуродовни чемпионатнинг иккинчи ярми учун ижарага олишни мақсад қилган.
“Кальяри”нинг бу мавсум ҳам ишлари яхши эмас. 17-турдан кейин сардинияликлар 14 очко билан хавфли зона – 18-ўринни эгаллаб турибди. Клуб раҳбарияти ҳужум чизиғини кучайтиришни режа қилган. Чунки “Кальяри” лигада энг кам гол ураётган тўрт жамоадан бири. Ҳужумчилар орасида Роберто Пикколи барча учрашувларда қатнашиб, тўртта гол урди. Леонардо Паволетти ва Зиту Лувумбу ҳисобида атиги биттадан гол бор холос. Жанлука Лападула голлар ҳисобини очгани йўқ. Айнан перулик ҳужумчи тез кунларда “Палермо”га ўтиб кетмоқчи. Элдор Шомуродов унинг ўрнига таклиф қилинади.
- “Кальяри” ҳужум чизиғини Элдор Шомуродов ёрдамида кучайтирмоқчи. Бироқ бунда бир муаммо бор. “Рома” ўзбек футболчисини тўлиқ трансфер қилмоқчи. “Кальяри”га Шомуродовни сотиб олиш ва катта маошини тўлаш оғирлик қилади.
Шомуродов Сардиния клубига ижарага ўтиши мумкин, лекин буни “Кальяри” январнинг охиригача кутиши керак. Чунки “Рома” қишки трансферлар даврида ўз ўйинчисини тўлиқ трансфер қиладиган даъвогар чиқишини кутади, - деб вазиятни шаҳрлади футбол эксперти Альберто Масу.
Элдор Шомуродов ўтган мавсум “Кальяри” сафида 24 та учрашувда учтадан гол ва ассист муаллифи бўлган. Ҳамюртимиз киритган тўплар ва самарали паслари сардинияликлар учун муҳим учрашувларда амалга оширилган ва жамоанинг юқори дивизионда қолишига хизмат қилган.
Жорий мавсумда легионеримиз римликлар сафида етарли ўйин амалиётига эга бўлмаяпти. Элдор 12 та учрашувда иккита гол ва битта ассист қайд этди. Бироқ бу баҳсларда майдонда ҳаммаси бўлиб, 285 дақиқа ҳаракат қилди холос.
Transfermarkt порталида ҳамюртимизнинг трансфер суммаси 4 миллион еврога тушди. Шомуродовнинг энг қиммат даври 2021 йилнинг октябрида “Рома”даги фаолиятини бошлаганида қайд этилган бўлиб, 14 миллион еврони ташкил этган. Шомуродов шу тариқа ўзбек футболи тарихидаги энг қимматбаҳо ўйинчи номини олган эди...