Шомуродов: Тахтни бўшат, мен келдим!
- 17-май, 00:00
- Zohir Toshxo’jayev
- 1
- Футбол
Туркия Суперлигасининг 34-турида “Истанбул Башакшеҳир” футболчилари “Газиантеп” жамоаси меҳмони бўлиб, сафар учрашувидан муҳим ғалаба билан қайтди.
Нури Шахин жамоаси муваффақиятида ўзбек футболчилари катта роль ўйнади. Дастлабк, Аббосбек Файзуллаев 6-дақиқада германиялик легионер Деви Зелькенинг голи уришига қулай пас узатиб берди.
22-дақиқада эса, Элдор Шомуродов пенальтини аниқ бажариб, Суперлигадаги голлари сонини 22 тага етказиб олди. Бу гол легионеримизни тўпурарлар пойгаси пешқадами Поль Онуачуга тенглашиб олишини таъминлади.
Истанбулликлар иккинчи бўлимда ҳарчанд ҳаракат қилмасин, рақиб дарвозасига бошқа йўл топа олмади. Аксинча, “Газиантеп” вакиллари бир марта жавоб тўпини киритиб, учрашувни 1:2 ҳисобидаги мағлубият билан якунлади.
“Трабзонспор” шарафини ҳимоя қилаётган Поль Онуачу тўпурарлар баҳсида таъқибчиларидан анча илгарилаб кетган эди. Бироқ нигериялик форвард 4 апрелдан буён рақиблар дарвозасига йўл топа олмаяпти ва қуруқ серияси бешта ўйинга етди.
Бу жараёнда Элдор Шомуродов охирги олтита ўйинда рақиблар дарвозасини олти маротаба ишғол қилиб, чемпионатдаги голлар сони бўйича Полб Онуачуга тенглашиб олди.
Трабзонлик футболчилар охирги тур учрашувини 17 май куни ўз майдонида “Генчлербирлиги” жамоасига қарши ўтказади. Шу баҳсда Поль Онуачу гол уриб, Шомуродовдан яна ўзиб кетишга ва “Олтин бутса”ни ўзиники қилишга ҳаракат қилади.
Шу ўринда таъкидлаш керакки, Элдор Шомуродов 22 та голидан 18 тасини ўйиндан киритган ва бу кўрсаткич бўйича Суперлигада энг зўр ҳужумчига айланди. Ҳамюртимиз тўрт бор пенальтидан гол урган.
Поль Онуачу эса, 22 та голдан олтитасини 11 метрлик белгидан киритган ва ўйиндан 16 та гол урган. Учинчи ўринда бораётган “Фенербаҳче” форварди Талисканинг ҳисобидаги 19 та голдан бештаси пенальтидан дарвозага жойланган.
“Фенербаҳче” ҳам чемпионатдаги охирги баҳсини 17 май куни ўтказади ва ўтган турда хет-трикка эришган Талиска яна камида шунча гол урсагина, тўпурар пойгаси пешқадамлигига аралаша олади.
Туркия юқори дивизионида дебют мавсумини ўтказаётган Элдор Шомуродов “Башакшеҳир” вакиллари орасида чемпионатнинг барча ўйинларида майдонга тушган ягона футболчидир.
30 ёшли форвардимиз деярли барча рақиблар дарвозасини ишғол қилишга муваффақ бўлди. Хусусан, Элдор 17 та рақиб жамоадан 14 таси, яъни “Бешиктош”, “Аланьяспор”, “Коньяспор”, “Галатасарой”, “Антальяспор”, “Кожаэлиспор”, “Генчлербирлиги”, “Трабзонспор”, “Касимпаша”, “Самсунспор”, “Газиантеп”, “Фотиҳ Карагюмрюк”, “Ризеспор” ва “Эюпсор” дарвозасини ишғол қилди. “Фенербаҳче”, “Кайсериспор” ва “Гёзтепе” эса, чемпионатнинг ҳар икки ўйинида Шомуродовнинг гол уришига йўл бермаган жамоалар бўлиб қолди.
“Истанбул Башакшеҳир” чемпионатни бешинчи ўринда якунлади ва Еврокубокларда иштирок этиши учун Туркия кубоги финали натижасини кутиши керак. Унда “Трабзонспор” футболчилари “Коньяспор” жамоасини мағлуб этса, Шомуродов жамоадошлари билан бирга келаси мавсум халқаро миқёсдаги мусобақаларда қатнашиш ҳуқуқини қўлга киритади.