Супергол урган Шомуродов: Овора бўлма, барибир етолмайсан!
- 31-январ, 20:57
- Zohir Toshxo’jayev
- 0
- Футбол
Туркия Суперлигасининг 20-турига келиб, мамлакат чемпионлиги, Еврокубок йўлланмалари ва тўпурарларнинг “Олтин бутса”си учун кураш жуда қизғин кечмоқда.
Ўзбекистон миллий терма жамоаси етакчилари – Элдор Шомуродов ва Аббосбек Файзуллаев ўйнаётган “Истанбул Башакшеҳир” жамоаси бу турда ўз майдонида “Ризеспор” футболчиларини қабул қилди.
Бу баҳсда икки легионеримиз бошланғич таркибда майдонга тушди. “Ризеспор”даги вакилимиз Ҳусниддин Алиқулов оғир жароҳат туфайли кейинги пайтда ўйинларга жалб қилинмаяпти.
Қизғин ўтган тўқнашувда ҳисобни очиш Элдор Шомуродовга насиб қилди. 19-дақиқада 30 ёшли ҳужумчи жамоадоши узатган тўпни бир ҳаракат билан рақиб дарвозаси тўрига жойлади.
Танаффусга чиқиш олдидан “Ризеспор” вакиллари жавоб тўпини киритиб, вазиятни ўнглашга муваффақ бўлди.
Ҳисоб тенглашгани боис, ўйиннинг иккинчи ярми анча кескин ва муросасиз ўтди. Ҳар икки жамоа бир неча кескин ҳужумлар уюштирди ва улардан биттаданини голга айлантира олди. Ҳисоб – 2:2 натижаси билан якунланди.
Бу баҳс олдидан “Олтин бутса” учун курашаётган Элдор Шомуродов катта босим остида қолганди. Чунки тўпурар пойгасида легионеримизни таъқиб қилиб келаётган Поль Онуачу чемпионатнинг иккинчи даврасида голли серия намойиш этиб, Элдор билан орадаги икки голли фарқни йўққа чиқарди.
20-турда Онуачу “Антальяспор”га қарши баҳсда икки маротаба пенальти тепди ва уларнинг биттасини голга айлантирди. Шу тариқа, нигериялик форвард умумий голлари сонини 13 тага етказиб, Элдорга етиб олди ва тобора босимни ошириб боришга ҳаракат қиляпти.
Шомуродов ҳам ҳар бир учрашувда рақиб дарвозасини ишғол қилиб, голлари сонини ошириб боришга уриняпти. Хусусан, ҳамюртимизнинг “Ризеспор” дарвозасига киритган тўпни уни тўпурарлар пойгасида яна якка пешқадамга айлантирди.
“Олтин бутса” учун курашда 11 та гол билан бу икки етакчини қувиб келаётган “Фенербаҳче”нинг бразилиялик легионери Талиска ҳам бу турда рақиб дарвозасини ишғол қилишга уриниб кўради. “Фенербаҳче” жорий тур ўйинини 2 февраль куни сафарда “Кожаэлиспор” жамоасига қарши ўтказади.
Таъкидлаш жоизки, Элдор Шомуродов Туркия Суперлигасига келганидан бери барча учрашувларда майдонга тушиб, мунтазам тўп киритмоқда. Ҳамюртимиз олий дивизиондаги 17 та рақиб жамоанинг аксариятига гол уришни уддалади. Хусусан, “Бешиктош”, “Аланьяспор”, “Коньяспор”, “Галатасарой”, “Антальяспор”, “Кожаэлиспор”, “Генчлербирлиги”, “Трабзонспор”, “Касимпаша”, “Самсунспор”, “Газиантеп” ва “Карагюмрюк” дарвозабонлари Элдорнинг зарбасидан кейин тўпни ўз дарвозаларидан олиб чиқди.
Энди бу жамоалар қаторига “Ризеспор” ҳам қўшилди. Шомуродов биринчи давра ўйинида бу рақибга гол ура олмаган эди. Элдор биринчи даврада ўзи тўп кирита олмаган “Эюпспор”, “Гёзтепе”, “Фенербаҳче”га чемпионатнинг иккинчи ярмида тўп киритишга ҳаракат қилади. “Кайсериспор” эса, чемпионатнинг ҳар икки ўйинида Шомуродовнинг гол уришига йўл бермаган ягона жамоа бўлиб турибди.
“Истанбул Башакшеҳир” чемпионат доирасидаги навбатдаги учрашувини 8 февраль куни сафарда “Эюпспор” жамоасига қарши ўтказади.