Шомуродов билан рақобат қилган юлдуз номини тарихга ёзди
- 22-май, 08:36
- Zohir Toshxo’jayev
- 0
- Футбол
Англиянинг ҳужумчи Тэмми Абрахам “Астон Вилла” таркибида ўйнаб, УЕФА Европа Лигасининг 2025-2026 йилги мавсуми финалида Германиянинг “Фрайбург” клуби устидан қозонилган ғалабадан (3:0) сўнг, учта асосий еврокубокда ғолиб чиққан тарихдаги иккинчи футболчига айланди.
Бу ҳақда Бирмингем клубининг Х (собиқ Twitter) ижтимоий тармоғидаги аккаунти хабар бермоқда.
Бундан олдин моҳир форвард 2020-2021 йилги мавсумда “Челси” билан Европа Чемпионлар лигасида бош совринни қўлга киритган.
Шунингдек, 2022 йилда “Рома” жамоаси таркибида Тэмми Абрахам ўша пайтда илк бор ташкил этилган УЕФА Конференциялар лигасида ғалаба қозонган. Бу турнирда ўзбек ҳужумчиси Элдор Шомуродов ҳам чемпион бўлган ва ўша мусобақада энг катта тезлик кўрсатган футболчи бўлгани қайд этилган эди.
Тэмми Абрахамдан олдин Европа қитъасининг учта нуфузли мусобақасида ҳам бош совринга эга чиққан биринчи футболчи айни пайтда “Марсель” шарафини ҳимоя қилаётган Эмерсон Палмьериҳисобланади.
Таъкидлаш жоизки, Тэмми Абрахам жорий мавсумни Туркия чемпионатида бошлаган эди. Қишки трансферлар ойнаси даврида тажрибали форвард “Бешиктош”дан “Астон Вилла”га кўчиб ўтди.
Абрахам “виллаликлар” сафида барча турнирларда 16 та ўйин ўтказиб, ўз ҳисобига учта гол ёздириб қўйди.
Элдор Шомуродов эса, Туркиядаги дебют мавсумини жуда муваффақиятли ўтказди. “Башакшеҳир”нинг етакчисига айланган 30 ёшли легионеримиз чемпионат давомида рақиблар дарвозасини 22 маротаба ишғол қилиб, “Трабзонспор” ҳужумчиси Поль Онуачу билан бирга лига тўпурари бўлди.