Шомуродов Бензема билан бир лигада ўйнаши мумкин
- 1-феврал, 09:35
- Zohir Toshxo’jayev
- 0
- Футбол
Жаҳон футболининг энг ёрқин юлдузларидан бири Карим Бензема Саудия Арабистонидаги фаолиятидан умуман қониқиш ҳосил қилмаяпти. Франциялик футболчининг “Ал-Иттиҳод” билан амалдаги шартномаси 20 июнь куни тугайди.
Клуб раҳбарияти Каримга янги битим таклиф қилди. Бироқ унинг шарт-шароити машҳур юлдузга ёқмади. Аввалроқ, турли манбалар Бензема шайхлардан Криштиану Роналду даражасида маош талаб қилаётганини ёзганди. Маълумки, “Ан-Наср” португалиялик тўпурарга 180-200 миллион евро миқдорида йиллик маош тўлаб келмоқда.
ESPN нашри маълумотларига қараганда, 38 ёшли футболчи Осиёни тарк этиб, фаолиятини Европа ёки АҚШ клубларида давом эттириш вариантини ўрганиб чиқмоқда.
Бензема Саудия Арабистони чемпионатининг навбатдаги турида майдонга тушишдан бош тортди. Шу тариқа, Карим унга таклиф қилинган шартномага эътироз билдиргани ва клубнинг унга муносабатидан норозилигини кўрсатгани айтилмоқда.
2023 йилнинг ёзидан бери “Ал-Иттиҳод” шарафини ҳимоя қилиб келаётган Бензема жорий мавсумда барча мусобақаларда 21 та ўйинда қатнашиб, 16 та гол урган. Футболчининг клуб билан амалдаги меҳнат шартномаси 2026 йилнинг ёзигача амал қилса-да, шартномани бекор қилиб, тез орада бошқа клубга ўтиб кетиши кутиляпти.
Хусусан, Туркия чемпионатининг энг номдор клубларидан “Бешиктош” Бенземани ўз сафига қўшиб олишга тайёр. Бу ҳақида таниқлик журналист Экрем Конур ўзининг X ижтимоий тармоғидаги саҳифасида маълум қилди.
Турк клуби Transfermarkt портали томонидан 6 миллион еврога баҳоланаётган футболчи билан шартномани муддатидан аввал бекор қилиш учун “Ал-Иттиҳод” раҳбариятига 3 миллион евро ўтказиб беришни таклиф қилди. Айни пайтда томонлар ўртасидаги музокаралар давом этмоқда.
“Бешиктош” яқинда англиялик ҳужумчи Тэмми Абрахамни “Астон Вилла”га сотиб юборган эди ва унинг ўрнини Карим Бензема билан тўлдиришни кўзлаяпти.
Умуман олганда, кейинги йилларда Туркия Суперлигаси жамоалари ўз таркибига Европа футболида ном қозонган ўйинчиларни жалб қилиши одат тусига айланди. Улар қаторига беш йил давомида Италия клубларида тўп тепган Элдор Шомуродовни ҳам қўшиш мумкин.
“Рома”дан “Истанбул Башакшеҳир”га кўчиб ўтган легионеримиз жорий мавсум Суперлиганинг 20 та учрашувида 14 та гол урган ҳолда тўпурарлар пойгасида пешқадамлик қилмоқда.
Бу мавсум Туркия Суперлигаси жамоаларида бразилиялик Эдерсон, Талиска, португалиялик Нельсон Семеду, ивуарлик Уильфрид Синго, нигериялик Виктор Осимхен, Уилфрид Ндиди, Пол Онуачу, германиялик Лерой Сане, Илкай Гюндоған, франциялик Маттео Гендузи, нидерландиялик Ноа Ланг, камерунлик Андре Онана, испаниялик Марко Асенсио ва аргентиналик Мауро Икарди каби жаҳон даражасидаги юлдузлар тўп тепмоқда.