Шацких ва Токотаев "Ал-Аҳли"га қарши дурангдан қониқишдими ёки...

“Андижон” - “Ал-Аҳли” (0:0) ўртасидаги учрашувдан кейинги матбуот анжуманининг иккинчи қисмида мезбонлар устози Максим Шацких ва ўйиннинг энг яхши футболчиси Эржан Токотаев қатнашдилар.

- Шацких: Хайрли оқшом. Ўйиндан қониқдим. Учрашув учун белгиланган стратегиямизни йигитлар бажаришди. Яхши ҳаракат қилишди ва ўйин сифатидан ҳам кўнглим тўлди. Ниҳоят, футболчилар майдонда нима хоҳлаётганимизни тўлиқ тушуниб ҳаракат қилишмоқда. Рақиб ҳақида гапирадиган бўлсам, тўғрисини айтаман, анча кучли. Тажрибали жамоа. Бу мантиқан тўғри. Яхши ўйин бўлди. Биз имкон қадар яхши ўйнашга ҳаракат қилдик ва очко ишлаб олдик. Ўйлайманки, телевизор орқали ва стадионда кузатган мухлислар ҳам баҳсдан мамнун бўлдилар.

- Токотаев: “Ўйин етарлича қизиқарли бўлди. Иккала жамоада ҳам ҳисобни очиш учун имкониятлар яратилди. Аммо гол ура олмадик. Дурангдан, ғалаба қозона олмаганимиздан қониқмадим. Тўғри, мағлубиятга учрамадик, аммо ғалаба ҳам қозонмадик. Ютишни жуда ҳам хоҳлагандик. Аммо натижа ёмон эмас. Кейинги беллашувларда албатта керакли натижаларни қўлга киритамиз, деб ўйлайман.

- 1 октябрь ўқитувчи ва мураббийлар куни билан табриклайман. Сизга соғлиқ тилайман ва “Андижон”да узоқ вақт ишлашингизни тилаб қоламан. Айтинг-чи, “Андижон”ни ғалабасига нима етишмади?

- Шацких: Ғалабага индивидуал маҳорат етишмади. Биринчи таймда нисбатан яхшироқ имкониятлар бўлди. Индивидуал жиҳатдан янада маҳоратлироқ бўлганимизда натижа ҳам бошқача бўларди. Иккинчи таймда бундай имкониятлар камроқ бўлди. Иккинчи таймга нисбатан биринчисида тажовузкорроқ ҳаракат қилгандик. Ҳужумларда аниқроқ ўйнаганимизда биринчи бўлимда ҳисобни очган бўлардик. Асосийси, мағлубиятга учрамадик. Ҳар сафар футболчиларга айтаман: яхши ҳаракат қилсак албатта ҳар қандай учрашувда имкониятлар бўлади. Вазиятлар фойдаланиш бугун бўлмаса, эртага, эртага бўлмаса ундан кейин албатта бўлади.

- Ўйиннинг 75-дақиқасидан кейин ҳимоявий тактикага ўтишга нима сабаб бўлди?

- Шацких: 75-80-дақиқалардан кейин жамоа бироз чарчади. Чунки унгача максимум куч сарфлади.  Захира ўриндиғимиз у қадар кенг эмас. Рақибимиз тактик томондан кучли эди. Охирида улар ҳужумни кучайтиришди. Тезкор қарши ҳужумларда рақибга муаммолар туғдирдик. Бунақанги қийин ва масъулияти катта учрашувларда ёш футболчиларни ўйинга киришиб кетиши осон эмас.