Сербиялик теннисчи 2050 йилгача мусобақалардан четлатилди
- Бугун, 12:07
- Zohir Toshxo’jayev
- 0
- Теннис
Халқаро теннисда ҳалолликни таъминлаш агентлиги (ITIA) сербиялик теннисчи Стефан Миличевични 24 йилга мусобақалардан четлатди ва унга 70 минг доллар миқдорида жарима солди, дея хабар бермоқда ташкилот матбуот хизмати.
Маълумотларга кўра, 29 ёшли Миличевич бир қатор келишилган ўйинларни ташкил этишда айбланмоқда. Тергов версиясига кўра, у 2022–2024 йиллар орасида олтита учрашув натижасига таъсир кўрсатган, шулардан бештаси унинг ўзи иштирок этган баҳслар бўлган. Шунингдек, у яна олти ўйин натижасини ўзгартиришга уринишда ҳам айбланмоқда.
Бундан ташқари, теннисчи бир неча профессионал спортчиларни коррупцион схемага жалб қилиш ёки шундай уринишларда айбдор деб топилган. Агентлик маълумотига кўра, ушбу тармоқ фаолияти натижасида бошқа бир қатор теннисчилар ҳам келишилган ўйинларда қатнашган.
ITIA томонидан расмий тергов 2026 йилда ўтказилган. Аммо Миличевич суриштирув жараёнида иштирок этмаган ва тергов билан ҳамкорлик қилмаган. Агентлик турли каналлар орқали унга етти марта алоқага чиқишга уринган, бироқ теннисчи бирор марта жавоб қайтармаган.
24 сентябрь 2026 йили тергов якунлари бўйича Миличевичга қоидаларнинг жиддий бузилиши ҳақида расмий хабарнома юборилган. У бу ҳужжатга ҳам муносабат билдирмагани сабаб, ITIA ички қоидалари ва жазо чораларини белгилаш бўйича тавсияларига мувофиқ, 9 октябрдан унга нисбатан 24 йиллик дисквалификация ва 70 минг доллар жарима расман кучга кирган. Сербиялик теннисчига нисбатан қўлланилган ушбу жазо 2050 йил 8 октябрга қадар амал қилади.
Дисквалификация муддати давомида Миличевичга ҳар қандай мусобақада иштирок этиш, спортчиларни тайёрлаш ёки World Tennis, WTA, ATP, “Катта дубулға” турнирлари ташкилотчилари ва миллий теннис ассоциациялари томонидан уюштирилган ёки улар томонидан тасдиқланган мусобақаларда томошабин сифатида ҳам қатнашиш қатъиян тақиқланади, дея қайд этилган ITIAнинг расмий баёнотида.
Маълум бўлишича, Миличевич профессионал фаолияти давомида ATP ёки ITF ҳимояси остидаги мусобақаларда бирор марта ҳам совриндорликка эришмаган. У асосан “Фьючерс” туркумидаги бошланғич даражадаги турнирларда иштирок этган. Унинг ATP рейтингидаги энг юқори кўрсаткичи якка разрядда 1338-ўрин бўлган, умумий статистикасида эса мағлубиятлар сони устун. Кортдаги барча йиллар давомида қўлга киритган соврин пули жами 4 858 долларни ташкил этган, холос.