Сентябрь ва октябрь ойида ташкил қилинувчи профессионал бокс оламидаги супер жанглар билан танишинг!

Жорий йилнинг куз ойи профессионал бокс ихлосмандлари учун супер жангларни тақдим этади.

Яъни, сентябрь, октябрда жаҳоннинг энг кўзга кўринган профессионал боксчилари ўз жангларини ўтказади.

Албатта, улар орасида бир қатор чемпионлик жанглари ўрин олган. Қуйида, биз ушбу ойда ташкил қилинадиган эътиборга молик, чемпионлик жанглар рўйхатини тақдим этамиз.

10 сентябрь - АҚШ

Оскар Вальдес (29-0, 23КО) – Робсон Кансейсау (16-0,8 КО)

Иккинчи ярим енгил вазн (58, 967 кг) тоифасида WBC чемпиони мексикалик Оскар Вальдес, рейтингда 14-ўринда қайд этилган Бразилия вакили Робсон Консейсауга қарши ўз титулини ҳимоя қилади. Бразилиялик боксчини яхши танийсиз, у 2015 йилги жаҳон чемпионатида Рио Олимпиадаси йўлланмаси учун жангда Элнур Абдураимовга имкониятни бой берганди. Бироқ, мезбон сифатида ушбу тўрт йилликнинг нуфузли турнирида иштирок этган Робсон ҳамюртимиз Хуршидбек Тожибоевни мағлуб этган ва кейинги босқичларда ҳам рақибларини енгиб, Олимпиада чемпионига айланган эди. Хуллас, икки мағлубиятсиз одимлаётган чармқўлқоп усталарининг жанги мухлисларни бефарқ қолдирмаса керак.

25 сентябрь – Буюк Британия

Энтони Жошуа (24-1,22 КО) - Александр Усик (18-0,13 КО)

Шубҳасиз, ушбу жангни барча орзиқиб кутаётганлиги аниқ. Энг оғир вазн (+90, 7 кг) тоифасида IBF, WBO, WBA, IBO чемпиони Жошуа ўз ватанида украиналик супер жангчи Александр Усикдан ўз камарларини ҳимоя қилади. Юқорида таъкидлаб ўтганимиздек, британиялик боксчи IBF, WBO, WBA чемпиони саналса, даъвогар Усик IBFда 3-ўрин, WBOда 1-ўрин ва WBAда 4-ўринда қайд этилган.

5 октябрь – АҚШ

Теофимо Лопес (16-0,12 КО) – Жорж Комбосос (19-0,10 КО)

Енгил вазн (61, 2 кг) тоифасидаги ушбу жанг  WBC, IBF, WBO, WBA чемпионлик камарлари учун ўтказилади. Лопес бу вазнда барча камарларни амалдаги соҳиби ҳисобланса, австралиялик Комбосос IBF рейтингида 1-ўринда, WBAда 11-қатор, WBOда 2-ўрин ва WBCда ҳам 11-поғонани эгаллаб турибди. Табиийки, ушбу тўқнашув ҳам ажойиб кўриниш олади.

9 октябрь – АҚШ

Тайсон Фьюри (30-0-1,21 КО) –Деонтей Уайлдер (42-1-1, 41 КО)

Бу жангга ҳам бўлган қизиқиш жуда юқори эканлигини таъкидлаб ўтиш жоиз. Сабаби, бу уларнинг учинчи баҳсидир. Дастлабкисида жанговар дуранг қайд этилган бўлса, иккинчисида Фьюри рақибини техник нокаут билан мағлуб этганди.

Албатта, ушбу жанг ҳам чемпионлик учун бўлади. Яъни, ўртага энг оғир вазн ( +90, 7 кг) тоифасидаги WBC чемпионлик камари тикилган. Бу титулнинг амалдаги соҳиби эса британ боксчиси Тайсон Фьюри ҳисобланади.

23 октябрь – АҚШ

Жамал Херринг (23-2, 12 КО) – Шакур Стивенсон (16-0,8 КО)

Яна бир иккинчи ярим енгил вазн (58, 967 кг) тоифасидаги чемпионлик жанги юқорида зикр этилган икки истеъдодли чармқўлқоп усталари ўртасида бўлиб ўтади.

Яъни, Херринг ўзига тегишли бўлган WBO чемпионлик камарини ватандоши АҚШ вакили Шакур Стивенсондан ҳимоя қилади.

Хуллас, биз сентябрь ҳамда октябрь ойларида мана шундай қизиқарли ўтиши кутилаётган жангларнинг гувоҳига айланамиз. Албатта, бу ҳозирга қадар расман аниқ бўлган жанглар рўйхати. Яна ким билади, дейсиз? Эҳтимол, яна шундай шиддатли жанглар ушбу ойлардан ўрин олар...

Воқеалар ривожини кузатиб борамиз!