“Ньюкасл”нинг швециялик ҳужумчиси Александр Исаак жамоа машғулотларига келмаяпти ва янги мавсумнинг дастлабки расмий учрашувларида ҳам қатнашмоқчи эмас.
Daily Mail нашрининг ёзишича, клуб мутасаддилари тартиб-интизомга риоя қилмаётган ўйинчига нисбатан ҳали ҳеч қандай интизомий чора кўргани йўқ.
Агар Исаак Англия Премьер-лигасининг биринчи туридан ўрин олган ва 16 августга белгиланган “Астон Вилла”га қарши учрашувга келмаса, “Ньюкасл” хўжайинлари ҳужумчига нисбатан жазо қўллайдиган бўлди.
Ўз навбатида, “қарғалар” Исаак трансфери бўйича “Ливерпуль”нинг 138 миллион евролик таклифини қабул қилмади. Александрнинг ўзи чемпион жамоага кўчиб ўтмоқчи. Унинг манфаатларини ҳимоя қилаётган агентлар агар ўйинчи “Ньюкасл”га ён босса, клуб ўйинчини қўйиб юбормаслигини уқтирмоқда.
2022 йилдан бери “Ньюкасл” шарафини ҳимоя қилаётган Александр Исаакнинг амалдаги шартномаси 2028 йилнинг ёзигача давом этади. Машҳур ҳужумчи шу пайтга қадар 109 та учрашувда рақиблар дарвозасини 62 марта ишғол қилган.