Саудияликлар Левандовскига тушида кўрмаган маош ваъда қилди

Саудия Арабистонининг “Ал-Ҳилол” клуби “Барселона” билан шартномаси якунланиб келаётган ҳужумчи Роберт Левандовскини ўз сафига қўшиб олишга қизиқиш билдирмоқда.

Шайхлар футболчини трансферга кўндириш учун унга йилига 90 миллион евро маош кўрсатилган шартнома таклиф қилмоқда.

Бу ҳақда Sportowe Fakty нашри хабар бермоқда.

Нашр маълумотига кўра, польшалик ҳужумчиси Каталония клуби билан тугаётган шартномасини узайтирмаслиги мумкин, чунки унга ўйин вақти қисқартирилиши ва маош камайтирилиши айтилган.

Шу фонда ҳужумчи “Ал-Ҳилол” таклифини жиддий кўриб чиқмоқда ва эҳтимол уни қабул қилади.

Левандовски 2022 йил ёзидан буён “Барселона” сафида ўйнаб келмоқда. Жорий мавсумда у барча мусобақаларда 43 та ўйинда қатнашиб, 18 та гол ва иккита голли узатмага муаллифлик қилди.

Transfermarkt портали маълумотига кўра, футболчининг бозор қиймати 8 миллион еврони ташкил этади.