Сардор Азмун Эрон терма жамоасига қайтди

Эрон терма жамоасининг ҳужумчиси Сардор Азмун Жаҳон чемпионатидан кейин яна яна миллий жамоага чақирилди.

31 ёшли футболчи бош мураббий Амир Галенои томонидан Ўзбекистон ва Россияга қарши ўртоқлик учрашувлари учун тузилган 26 футболчилик таркибдан жой олди. Азмун май ойида Жаҳон чемпионати учун Эрон терма жамоаси таркибига киритилмаган. Ўшанда унинг таркибдан четда қолиши кўпчиликни ҳайрон қолдирганди. Хабарларга кўра, бунга футболчининг АҚШ ва Исроил билан давом этаётган уруш вақтида ижтимоий тармоқдаги пости сабаб бўлган ва бу Эрон расмийларининг норозилигига сабаб бўлган.

 
Азмун якшанба куни Эрон футбол федерацияси президенти Меҳди Таж билан учрашгани ҳам акс этган суратлар эълон қилинди.

Футболчи терма жамоага қайтганидан сўнг ижтимоий тармоқдаги саҳифасида ўз ҳис-туйғулари билан бўлишди:
“Ростини айтсам, ҳис-туйғуларимни сўз билан ифодалаш қийин. 2014-йилдан бугунги кунгача бу либосда жуда кўп нарсаларни бошдан кечирдим. Келдим, кетдим, таркибдан четда қолдим, яна қайтдим.
Аммо ҳеч қачон, ҳатто терма жамоада бўлмаган пайтларимда ҳам, ўзимни миллий жамоадан ажралгандек ҳис қилмаганман.”

Ҳужумчи терма жамоадан узоқда қолган даврини ҳам эслади.
“Мен терма жамоани жула ҳам соғиндим. Бугун яна чақирилганимни билганимда, худди илк бор терма жамоага чақирилгандаги каби хурсанд бўлдим.
Ҳеч кимдан хафа эмасман ва ҳеч кимга ниманидир исботлашим шарт эмас. Мен шунчаки ўзим севган мамлакат учун бор кучим билан яна курашиш имкониятига эга бўлганимдан хурсандман.”

Эндиликда ҳужумчи Эрон терма жамоаси билан Ўзбекистонга қарши баҳсда майдонга тушиши мумкин. Эрон ушбу ўйиндан кейин Россияга қарши ҳам ўртоқлик учрашуви ўтказади.

Маълумот учун, Азмун Эрон терма жамоаси сафида 2014-йилдан буён тўп тепиб келмоқда. У миллий жамоа учун 91 та учрашувда 57 та гол урган.