Самвел Бабаян "Ал-Иттиҳод"га қарши баҳсда панд берган жиҳат ҳақида гапирди (Матбуот анжумани)

Осиё чемпионлар лигаси 1/8 финалидан ўрин олган "Навбаҳор" - "Ал-Иттиҳод" баҳси бўлиб ўтди. Кескин ва муросасиз ўтган баҳсда жамоалар 0:0 ҳисобидаги дурангга имзо чекди.

Биринчи бўлимда меҳмонлар кучлироқ ўйнаган бўлса, иккинчи бўлимда "лочинлар" кўпроқ ҳужум қилди ва вазиятлар яратди. Наманган жамоасининг янги футболчилари Сайфиев, Жиянов, Ҳамробековлар асосий таркибда майдонга тушди. Никабадзе, Фаваз Ал Ями, Самвел Бабаян ва Одилжон Ҳамробековлар ҳакам томонидан сариқ карточка билан жазоланди.

Беллашувдан сўнг ҳар икки жамоа бош мураббийлари иштирокида матбуот анжумани бўлиб ўтди. Қуйида "лочинлар" устози Самвел Бабаяннинг фикрлари билан танишиб чиқишингиз мумкин:

- Бугунги Осиё Чемпионлар лигаси плей-офф ўйини "Навбаҳор" учун жуда муҳим эди. Асосий муаммойимиз - ҳали жамоа яхши формада эмаслиги. Шундай бўлса-да, йигитлар жуда ташаббускор ва зич футбол намойиш этди. Барибир айрим футболчилар машғулотларга бир ҳафта олдин киришган. Мазкур жиҳат бироз панд берди, дея оламан. Натижага келсак, Осиёнинг кучли жамоаларидан бирига қарши ўйнадик. Шу туфайли биз кўпроқ тўпсиз ҳаракат қилдик. Биз ҳам кўп вазиятлар яратдик. Афсуски, уларни якунлашда муаммолар бўлди. 

- Иброҳим Йўлдошев жароҳат олганидан сўнг Йован Жокични ҳимояга туширдингиз. Бу менимча иш берди. Балки янги мавсумдан Жокични янги позицияда кўрармиз? 

- Чиндан ҳам Йўлдошевда жароҳат бор эди. Таркибимизга келсак, топ футболчилар сони барибир чекланган. Шу сабабли, Йованни бу позицияда синадик ва у бугун ҳимояда ўта ишончли ва сифатли ўйин кўрсатди. Ҳозир Жокич чемпионатимиздаги энг сифатли футболчилардан бири ва ишонаманки у исталган нуқтада ҳаракат қила олади. 

- Фаррух Сайфиев ва Одил Ҳамробеков Осиё кубоги туфайли жамоа машғулотларида кўп иштирок этмади. Бироқ улар "лочинлар"га жуда тез мослашиб кетибди. Қолганларда адаптация жараёни қандай? Шунингдек, трансфер ойнаси якунланганга қадар яна янгилик кўришимиз мумкинми?

- Жуда ҳам яхши савол. Ростдан ҳам улар жуда тез мослашиб кетди. Қолганларга келсак, Русланни ҳам алоҳида эътироф этиш керак. У ҳам яхши ўйин ўтказди ва рақиб дарвозаси олдида кўп хавф яратди. Энг муҳими, у жамоага ҳужум ташкил қилишда катта ёрдам беради. Трансферлар ҳақида гапирсам, ҳали ойна очиқ. Ҳозирги кунда бизда етарлича футболчилар бор. Яна билмадим. Буни муҳокама қилиб кўрамиз. 

- Дуранг натижа сабаблари ва жавоб учрашуви ҳақида гапирсангиз?

- Бугун ютишимиз мумкин эди. Бу қадар қийин учрашув бўлишига сабаб - бу рақиб фактори. Уларнинг таркибида икки нафар Европа Чемпионлар лигасида тўп тепган футболчи бор. Биз бу мавсум ҳисобидан илк расмий ўйинимизни ўтказдик. Жавоб ўйинига келсак, биз курашамиз ва максимал имкониятларимиздан фойдаланамиз. 

Маълумот учун, жавоб баҳси 22 февраль куни бўлиб ўтади.