Саксон миллионлик трансфер пишяпти
- 25-апрел, 08:42
- Zohir Toshxo’jayev
- 0
- Футбол
Европанинг икки гранди – “Бавария” ва “Барселона” клублари “Милан”нинг португалиялик ҳужумчиси Рафаэль Леауни сотиб олиш имкониятини жиддий кўриб чиқмоқда.
La Gazzetta dello Sport нашри маълумотига кўра, 26 ёшли португалиялик футболчининг 80 миллион евро эвазига кетиши реал вариантга айланиши мумкин.
Таъкидлаш жоизки, Леаунинг охирги ойларда миланлик мухлислар билан муносабатлари кескин ёмонлашган. Қолаверса, мураббийлар штаби вакиллари билан ҳам ўртага совуқчилик тушган.
Леаунинг шартномасида бу футболчи учун 175 миллион евролик товон пули кўрсатилганига қарамасдан трансфер амалга ошиши мумкин.
Ҳужумчи учун вариантлардан бири Англия Премьер-лигасидаги “Манчестер Юнайтед” бўлиши мумкин, шунингдек, Саудия Арабистони клублари томонидан ҳам қизиқиш мавжуд.
Леау “Милан” сафида 2019 йил августидан буён ўйнаб келмоқда. Унинг шартномаси 2028 йил 30 июнга қадар амал қилади. Жорий мавсумда ҳужумчи 26 та ўйинда майдонга тушиб, 10 та гол урди ва икки марта голли узатма берди.
Transfermarkt портали Леаунинг трансфер қийматини 65 миллион евро деб баҳоламоқда.